Anthony Geerman mester paga henter e suma cu el a horta di AruTram bek! Ta trata aki di un total di Afl. 134.886,14 cu el a malversa durante algun aña cu e tabata Operations Manager na AruTram. Hues a bay di acuerdo cu e peticion di AruTram pa cobra e ex trahado aki henter e suma, den un caso civil, mientras e caso penal ta cana paralelo.
Ken ta Anthony Geerman
Anthony Geerman, naci na Februari 1968, cu un salario di mas o menos 5 mil florin pa luna, den pasado tabata un Polis. Despues a traha pa hopi aña na Aeropuerto, como gerente di operacion na e compania di groundhandling AGS. Na un dado momento el a haya su brevet y a bira piloot tambe. Desde December 2012 el a cuminsa traha cu AruTram den e funcion di Operations Manager. Pero, a tuma nota cu mes tambe tabata Managing Director of tabata envolvi cu e compania Pro Care Services NV.
Kico tabata su funcion den AruTram
Polis a detene Anthony Geerman riba diamars 21 di November 2017, sospecha di malversacion na AruTram. E tabatin e funcion di gerente di operacion na e tram y como tal, tabatin poder pa tuma decisionnan y haci pago na companianan proveedor di servicio. Den e proceso el a cay den tentacion di corupcion, ora el a nota cu e proceso di control den compania no ta mucho estricto. En bes cu e controla pa AruTram, e mes a cuminsa probecha y paga su mes!
No a logra yega na un “deal”
Entretanto AruTram a retira e Hefe di Operacion for di momento cu a descubri e fraude. A purba yega na un acuerdo cune pafo di Corte pa e paga locual el a horta, pero no a logra. A opta e ora pa cana e caminda di Corte Civil cu e siman aki a dicta su sentencia.
Den Corte
Durante tratamento di e caso por a sinti cu e ex empleado aki constantemente tabata trata di saca su curpa di e debe aki, bisando cu e sucedido ta culpa di Arutram mes pa motibo di no a haci e control debido cu en realidad e mes tabata responsabel pa haci. Na final el a wordo condena pa paga e suma completo bek.
A crea un “shap den mi shap”
Dado momento a cuminsa un investigacion na AruTram unda cu e compania aki ta haci pagonan via cheque of efectivo na Pro Care den e periodo di juli 2014 te cu augustus 2017 pa un suma di 134.886,14 florin. Analisando e punto aki, Corte ta bisa cu den e funcion cu e tabata ocupa, e ex empleado tabatin na su disposicion un caha chikito semanal di 1000 florin, cu ta destina pa compranan diario pa maneho di AruTram. A keda constata cu e tabata coy di e caha chikito aki placa contante pa paga facturanan ficticio di Pro Care.
Relaciona cu esaki a dun’e su retiro di inmediato riba 30 october 2017.
AruTram a pidi pa Corte condena e ex empleado aki pa paga e suma ariba menciona cu a wordo malversa aumenta cu e interes legal desde 11 di december 2017. Corte den su veredicto ta bisa cu mester evalua si e ex empleado a faya of a actua inhusto pa cu Arutram y cu pa e motibonan aki e ta responsabel pa daño sufri.
Demanda di AruTram
Arutram den su caso ta bisa cu nan ta haci nan demanda basa riba un ‘onrechtmatig daad” di parti di e ex empleado. Anthony Geerman den Corte a purba defende su mes bisando cu e Director di AruTram tabata na altura di e sucedido, pero e ultimo aki a declara cu niun momento e tabata na altura di kico Anthony Geerman tabata haci, esta e practicanan fraudulento.
Tambe e ponencia di e ex empleado cu ta Pro Care mester wordo poni responsabel, ta wordo rechasa. Corte ta bisa cu Anthony Geerman a admiti e forma con e malversacion a wordo cometi. Cu e sistema aki el a haci mal uzo di su posicion como Operations Manager di AruTram y a actua incorecto pa cu e compania causando nan daño.
E ponencia cu esaki ta culpa di Arutram mes, pasobra nan no a controla e facturanan, no ta algo hustificabel. Esey tabata su tarea mes. Pero e mes tabata crea e facturanan ficticio di Pro Care y ta sconde esakinan, despues cu e pago a wordo realisa, den administracion di Arutram.
Sentencia di Hues
Hues a bay di acuerdo y a acepta e demanda di AruTram pa e ex empleado Anthony Geerman paga e suma completo malversa, mas interes for di december 2017 pa awo.
