Corte a para persecucion politico

Hues a duna e juffrouw di scol, Zuleika G. Wever rason den e caso cu el a entama na Corte di Ambtenarenzaken di Aruba contra Minister Endy Croes di Enseñansa y Deporte. E maestra a conta cu abogado mr. Brian Coffie como su acesor huridico mientras cu e mandatario a subi trapi cu hurista Y. Kaarsbaan di DWJZ. Na final hues a destrui e decision di e mandatario y a conden’e pa e cubri tur gasto di e caso, balora na Afl. 1400,=.

Tur cos ta sinta na un decision di ex-Minister Rudy Lampe, cu a otorga e maestra di scol di educacion special un decreto gubernamental dia 9 di september 2021, prome cu el a baha como minister. E decreto tabata como contesta riba peticion di Juffrouw Wever, pa e haya “vrijstelling van dienst” desde 1 di februari 2022 te 1 di februari 2027, sin cobra salario, pa e por traha y sigui un curso como educador na Hulanda. Cu e decreto firma pa e minister bou brasa, el a bay Hulanda, a huur cas, a hiba su dos yiunan pa busca scol, el a haya trabou y asina establece pa e siguiente cinco añanan na tera friu. 

Minister nobo – maneho nobo

Pero, ta parce cu ora Minister Endy Croes a asumi su funcion, e no a keda contento cu e decision cu su colega a tuma prome cu ne. Pues, e no a tuma decision mesora pero a warda dos siman prome cu e decreto gubernamental drenta na vigor, esta dia 18 di januari 2022, pa manda “trek in” e decreto gubernamental. Minister Croes a cambia e decreto y en bes di cinco aña, a duna Juffrouw Wever apenas tres luna pa e ta na Hulanda y despues di esey e mester presenta bek na scol pa sigui cu su labornan. E mandatario a argumenta su decesion, cu Minister Rudy Lampe no a tene cuenta cu e scarsedad di maestro di scol na Aruba ora el a duna Juffrouw Wever e permiso pa por traha y studia cinco aña na Hulanda, sin cobra salario na Aruba. 

E buelta politico

Zuleika Wever no ta desconoci riba red social y su opinion politico ta bastante cla y reconocibel pa tur hende. Ta sospecha cu esey mes lo por ta e motibo dicon, sin argumento balido, cu e mandatario a dicidi di cambia un decision. Pio e forma con el a hacie, no ora el a bira minister, sino dos siman prome cu su ehecucion. Pa colmo, e coordinador huridico di Ministerio di Enseñansa a traha e decreto robes tambe, cu a pone cu mester a corigi esun prome di dia 18 di januari den di dos decreto corigi di dia 16 di februari 2022. Den esey tambe por a nota e ansha di persecucion, pa di tur manera purba perhudica e maestra di scol den su intento pa sigui studia y progresa den su carera profesional den enseñansa.

E juffrouw a opone

Juffrouw Wever di otro banda a opone e decision y a emiti obhecion na corte. E ta demanda gobierno cu no por cambia e decision dos siman prome, sin tene cuenta cu gastonan cu el a haci pa muda y establece na Madre Patria. Ironia ta, segun e demandante a bisa hues, cu e mes a percura pa un reemplasante na su scol. Pero, e mesun Gabinete Wever-Croes a kita un otro maestra di su scol pa bira coordinador di Minister Rocco Tjon y cu a pone cu e reemplasante mester a bay reemplasa otro maestra. E demandante a subraya na hues, cu si tin scarsedad y e minister sa, ki mish’e ta kita maestra for di duna les pa haci nan “coordinador” den Cocolishi?!

Argumento di hues

Hues den Corte di Empleado Publico a evalua ambos argumento, tanto di e juffrouw di scol como di Minister di Enseñansa. E ta haya cu e decision di e mandatario, pa corta e permiso pa traha na Hulanda for di cinco aña pa tres luna, anto dos siman prome cu e decreto drenta na vigor como “niet redelijk”. Corte ta reconoce cu tin un scarsedad di maestro di scol na Aruba, pero manera cu e juffrouw a argumenta den corte, e mesun scarsedad ey tabatin na september 2021 tambe, ora a otorg’e bijzondere vrijstelling van dienst (BVVD). Riba dje, tur alumno ta hayando les normal. Pues na opinion di corte, e echo cu Juffrouw Wever a cera contract di huur di cas, di trabou y su yiunan a haya scol, ta pisa mas cu e decision di minister pa sin mas hala un decision otorga door di su colega aden. 

Sentencia

Cu henter e discusion aki riba mesa berde, cu argumentonan di ambos banda, hues a duna e juffrouw di scol rason den su “bezwaar”. Hues como tal a declara e bezwaar como “gegrond” y na mes momento a ordena Minister Endy Croes pa e destrui su decision di dia 18 di januari 2022. Tambe a condena e mandatario pa cubri e gastonan di corte, balora na Afl. 1400,=. Ambos partido tin tres luna pa apela e sentencia si nan no ta di acuerdo. Por acudi libremente na “Raad van beroep in Ambtenarenzaken”.