Hopi ta yama nan; e dos partidonan grandi mientras algun ta yama nan pa “partido tradicional.” AVP cu MEP ta den ‘full swing’ cu campaña electoral. Den fin di siman MEP a tene su congreso caminda proclama y aproba Evelyn Wever-Croes como nan lider p’e proximo cuater añanan. Durante un entrevista cu 24ora.com, e lider di MEP a anuncia cu; “desde awe, campaña ta cuminsa.” Bisando esey, Wever-Croes a priminti di ta mas activo den bario, reunion na nan sede y mucho mas.
Aunke di otro banda, lider di AVP, Mike Eman a comenta cu; “te awo nan a lanta fo’i soño.” Segun Eman, AVP ta on cu campaña desde eleccion 2021. AVP tur diadomingo tin reunion den bario, ta yuda cu yenamento di papel di belasting y ta asisti diariamente cu conseho huridico na Cas di Partido. Pues, e partidonan geel y berde ta racha di campaña caba. MEP ta campaña cu e gobierno y nan partido ta STABIEL mientras AVP ta den bario proclamando cu pueblo no por biba mas na man di e gobierno di MEP y RAIZ.
Durante un entrevista cu Raymond Kamperveen di RAIZ, el a comenta cu di berdad el a tuma nota di e anuncio di e partido geel y berde. Pero di nan banda, ainda no a cuminsa pero ta evaluando con pa start. RAIZ keto bay ta den parlamento trahando riba ley y cosnan pendiente na beneficio di pais. RAIZ ta conoci pa hiba nan campaña den un otro forma. No cu bandera y sticker manera e otro partidonan. Recien RAIZ a celebra nan prome lustro, caminda a reparti bacoba cu simia pa pueblo planta. Den campaña 2021 a parti fruta cu simia y na aña 2017 tabata core riba bicicleta.
E echo ta si cu tanto MEP como AVP a bay atras den e ultimo eleccion. MEP a logra no menos di 20701 voto mientras AVP 18348 voto. Mientras cu mayoria candidato di MEP a cay den voto, nan lider, mr. Evelyn Wever-Croes si a bay dilanti y a bira e votegetter di pais Aruba cu un total di 7518 voto. Di otro banda, lider di AVP a bay atras den voto, for di 7822 voto den eleccion 2017 pa 6668 voto den eleccion 2021. Eman no a drenta parlamento despues di a perde eleccion na 2017. E tempo ey AVP a keda e partido mas grandi aunke cu no a forma gobierno mirando e conflicto entre AVP y POR.
