Tabata un regalo di Gobierno di Hulanda pa manda mas o menos 120 Dokter y Nurse specialisa den atende pashentnan interna den Cuido Intensivo a yega net prome cu fin di siman for di Miami riba un vuelo charter paga pa Hulanda. E vuelo a pasa Corsou y despues a bin trece mas o menos 21 profesional di cuido pa Aruba. E mesun dia a resulta cu un di e Dokternan cu a baha na Corsou ta contagia cu Coronavirus. A dicidi mesora pa manda tur bek awe pa Miami, pa falta di confiansa den e forma con nan a maneha nan mesun asuntonan. E ta un eror inaceptabel, asina un ehecutivo medico a bisa.
Otro siman un otro grupo lo regresa Corsou y Aruba, pero sperando cu e biaha aki si e proceso di eleccion y reclutacion lo ta miho cu e biaha aki. No por ta asina cu un Dokter cu a test positivo desde inicio di e luna aki por ta riba e lista pa bin e islanan den Caribe Hulandes. Riba dje no ta un “fabor” nan ta bin haci, sino ta bon placa Hulanda a paga nan pa bin brinda servicio di cuido y pa educa nos nursenan miho debi na e experiencia amplio cu nan tin na Merca.
Mester menciona cu na e momento aki Aruba tin 12 unidad di Cuido Intensivo cu por uza. A menciona di lo por yega na 34 mes, pero ainda nan no ta instala, of den uzo ni tin suficiente nurse of Intensivist pa traha cu nan. Parce cu tin entre 5 pa 10 ex Nurse specialisa di ICU cu a bay traha na Inspectie, na ImSan of den sector priva cu por regresa riba yamada di Hospital pa duna un man si ta necesario. No a yama nan pa activa asina, pero si a busca ayudo for di Merca.
Danki Dios cu te ainda na Aruba e situacion no a alcansa un nivel den cual mester a uza tur e cambernan di Cuido Intensivo pa pashentnan di Coronavirus. Mayoria pashent den e cambernan specialisa aki ta pa otro motibo, entre otro retonan cu curason. E binmento di 21 nurse y Dokter specialisa den maneho di pashentnan den ICU ta den forma preventivo, den caso cu presenta un situacion di brote cu ainda no ta asina. Djis cu Gobierno y Hospital kier ta bon prepara y cla pa si presenta un scenario asina, cu Aruba ta cla p’e!
