Den un resumen di Toque de Queda, por bisa cu despues di e alivio pa polisnan durante dos dia largo unda cu tabatin apenas dos detencion riba cada dia, e prome dia di fin di siman tabata diferente.
Segun e informe ricibi for di Polis, tabatin un total di 6 persona deteni. Di e total di seis aki, 5 tabata hende muhe, incluyendo dos cu tabata parti corant y cu a mustra un documento cu ta permiti nan pa haci esey.
Den e conferencia di diabierna anochi Fiscal mr. Yolanda Pronk a duna un resumen desde introduccion di medidanan. Durante e 34 dianan di TDQ 446 persona a keda deteni y a haya boet pa no cumpli cu TDQ. Solamente un persona a haya pa no cumpli cu Shelter in Place cu tin 24 dia vigente. Pa samenscholing no tin boet duna. Cinco negoshi a haya boet pa no cumpli cu orario di cierre, y 2 persona a haya PV pa no cumpli cu cuarentena.
Pa loke ta Task Force, su trabou cu a cuminsa dia prome di april, cu ta controla si un establecimento ta esencial of no, si e ta cumpli cu higiena y si ta cumpli cu distanciamento social. Un total di 2457 establecimento a keda controla, 40 a wordo cera pasobra nan no tabata wordo considera esencial y 91 a wordo cera temporalmente te ora cu nan tabatin tur cos bon regla.
Pronk tambe a bisa cu Ministerio Publico a tuma nota di menasanan riba rednan social y cu nan lo actua, investigacion.
