Tabata tin diferente biaha cu nan a haci relaciona cu e prohibicion of entrada di boto for di Venezuela. Ricky Croes, director di Douane a conta kico ta e esfuersonan haci, unda a preta y kico a logra.
El a splica cu desde cu minister Stef Blok a firma e acuerdo na Caracas, tur cos a bay acelera. Eynan ta haya cu el a firma na April, na April mes a dicidi di sinta cu tur partner den e parti maritimo, Kustwacht, Directie Scheepvaart, Polis, ASTEC, APA, tur a sinta hunto pa por a brainstorm riba tur e problematicanan cu nan ta haya nan mes cun’e y kico ta e solucionnan mester bin cun’e.
Dia 11 di Mei a haya conseho. Dia 13 tin un Advies a bay pa minister. A tene cosnan un rato cera te ora cu tin acuerdonan concreto cu Venezuela. Despues di esey a reuni na Corsou, pero eynan no a haya e documentonan cu a pidi y finalmente, un siman prome cu a bay, tabata tin un opdracht di prome minister, pa forma un petit commitee pa logra algo sikiera riba e nivel regional, cual a haci tambe, Aruba-Falcon. Dia 31 di Mei y 1 di Juni tabata na Falcon unda nan tabata tin un bon reunion. Tabata un reunion cu a bay hopi eficiente. E tabata pisa, pero a saca bon resultado di dje.
Kico lo pasa diaranson awo
Na momento cu frontera a cera, tabata un momento cu por a dal un stap bek y cuminsa pensa con ta bay sigura nos frontera miho. A papia cu imigracion pa loke ta e diferente aspectonan di hende of di labor, hendenan cu ta sali bay traha afo, droga, arma, productonan cu ta bin cu ta prohibi di sali for di Venezuela. A sinta delibera riba e miho sistema pa traha y a bin cu un proceso unda cu tur ta envolvi y ki ora ta saca un barco bek.
Ora cu a bay Venezuela, a wak e proceso di nan tambe y a bin haya e ora e documento y e seyonan necesario cu por uza aki pa e controlnan cu tin y a pone e ora e responsabilidad bek na Venezuela. Nan ta controla y si cosnan yega aki ta sali for di punto di bista cu tur cos ta corecto y tur cos ta klop, cu e por drenta.
Esey ta nifica cu dia 7 di Juni, manera cu e barconan cuminsa yega, e control ta sigui manera cu tin’e planea. Cada un di e actornan tin cu haci e trabao cu nan tin cu haci. Directie Scheepvaart ta haci control riba e botonan. ASTEC tin cu wak unda e boto ta para, Imigracion ta wak e hendenan, Douane ta wak e productonan cu nan ta trece y na final ta haya polis cu Kustwacht, ta duna un sosten den e parti tecnico.
Lo enfoca mas tanto riba fruta, berdura y pisca. Esey tabata e prome opdracht. Mirando cu pueblo di Aruba tin mester di fruta, berdura y pisca, e minister tabata bon cla pa bisa pa traha riba esey. Despues e restonan lo bin. Locual a logra awor aki cu Falcon, ta un ehempel cu por haci pa tur e otro productonan tambe.
E lanchanan
Croes a splica cu tabata tin diferente minister cu a saca nan MB. Un di nan no lo acepta e peñeronan cu ta bin habri, sino barconan mas grandi di carga. Eynan ta haya cu Directie Scheepvaart tin su tarea. Pa e otro productonan, tambe tin regla cu a pone. Locual ta trata koper, a pone e respondabilidad na Venezuela. Si a caso no bin cu e documentonan necesario y original, e ora ey ta manda nan bek of ta confisca nan of nan ta wordo persigui penalmente segun nos leynan.
Tempo di prueba
E tin un tempo di prueba. Ta bon pa tuma tur esunnan cu ta bin por ehempel for di Colombia acerca. Pero pa loke ta Venezuela ta tempo di prueba. Cosnan a normalisa den e sentido cu tin fruta, berdura y pisca lo drenta bek. Cu reunionnan despues, por yega na acuerdonan pa e otro cosnan cu ta bin tambe por drenta y di ki forma nan por drenta.
Reaccion na Venezuela
Na Corsou tabata tin un reunion y Venezuela mes a aplaudi e decision cu Aruba a tuma. Si tin e acuerdonan traha, con ta bay traha, e ora por traha na un miho manera. Venezuela mes tabata hopi contento cu e manera cu Aruba a actua y tanto pa e paro prome, como awor aki tambe cu a yega na e acuerdonan cu tin cu bay traha hunto. Tin mas contacto estrecho y intercambio di informacion ta mas facil pa asina haci e controlnan miho, Croes a mustra.
