Pa hopi cuidadano e ta un pilder dificil pa guli ya cu e gobierno actual a wordo poni eynan apenas algun luna pasa na aña 2017. Palabranan cu tur dia tawata den boco di mandatarionan actual manera “ser humano ta central” of “costo di bida ta halto” awe na 2018, a sea wordo lubida of por wordo considera como simplemente promesanan bashi di parti un coalicion forma door di MEP/POR/RED.
Hecho ta cu e gobierno actual a profila su mes como un gobierno humano cu lo tene cuenta cu necesidad di un pueblo cu segun nan tawata biba den epoca dificil. Pero awor a resulta cu ta net a nan a traiciona confiansa di un pueblo flagrantemente. Con nan a hasi esaki? E contesta riba e pregunta aki por wordo saca afor riba decisionan tuma relaciona cu presupuesto di pais Aruba 2018. Loke mester tawata tarea number 1 di gobierno actual esta di reduci gastonan di personal, luho y promocion. Contrario na esaki a dicidi pa concientemente complace full sostenedornan di partido asina mancando e budget di pais Aruba. Sigur loke a resalta desde un comienso ta e extra gasto cu a keda existi ya cu no a reduci ministernan na 7 pero a dicidi pa keda cu 8. Cada minister a check flota nobo di autonan di luho y a nombra y crea funcionan cu nunca a yega di existi. Ehempelnan chikito di un desperdicio total di placa. Imaginabo cu “Hala faha mara “mester tawata e prioridad di Gabinete Wever-Croes pero lamentablemente tawata “too good too imagine”.
Poder di compra afecta
Den presupuesto 2018 tawata obvio cu e gabinete actual lo no a cumpli na hiba un maneho responsabel pa “lead by example”. Poder a afecta nan cabes cu consecuencia cu a lubida riba e motibo real dicon nan ta eynan! Baha costo di bida mester tawata un di e promer accionan di parti gobierno actual, pero a dicidi pa aumenta entrada di gobierno pa asina por paga gastonan extra cu e gobierno actual a dicidi di hasi. Manera pueblo ta na altura dia 1 juli 2018 Aruba lo ta prome pais den caribe pagando 3 diferente impuesto indirecto riba sea compras hasi of servicionan tuma. Mescos cu na 2007 cu MEP a introduci BBO y afecta poder di compra cu e belasting acumulativo aki , e aña aki a introduci un impuesto nobo jama “BAVP” cu e intencion di manipula hende cu ta partido di gobierno anterior ta e causante. Realidad ta cu un biaha mas pueblo pa via di un decision di MEP un biaha mas lo wordo afecta den su cartera.
Como sifuera ta poco , no ta via belasting so Gabinete Wever-Croes lo ta afectando poder di compra. Ya cu den e plan di FEM a anuncia cu lo bai saca por lo menos 10 miyon florin na accijns di gasoline. Si pueblo a ripara ya caba gasoline a subi door cu a tuma e decision aki y ainda e aumento no ta completamente aplica. Esaki ta pone cu den proximo lunanan lo bai sigui aumenta gasoline. Pa un partido cu a critica cobransa di motorrijtuigenbelasting den accijns y awe draai hasi esaki ta un hecho bastante hipocrita y riba dje mas devastador ainda pa e consumidor y hasta comerciantenan.
E ultimo acontecimiento ta esun di mas inespera. Tempo cu a introduci BBO tawatin diferente “vrijstellingen” cu ta exoneracionan caminda BBO no ta aplicabel. Pero a resulta cu awor Gabinete Wever-Croes deliberadamente a elimina e vrijstelling cu lo tawata aplicabel pa servicionan bancario. Awor riba tur comicion cu banco haya e lo ta cobrando e consumidor.
Si bo bai paga bo recibo di awa / coriente, si bo hasi deposito. Ora di bai paga skol mayornan ta wordo confronta riba placa extra riba e administratiekosten cu ya caba ta halto. Si bo tin un atm card y ta wordo cobra tur fin di luna pa esei BO TA BAI paga mas! Esaki ta un sla duro contra henter un comunidad cu a kere den promesa falso di Gabinete Wever-Croes. Realidad a bati na porta ya cu eliminacion di e vrijstelling pueblo lo bai sigui cai atras den su poder di compras ya cu ni banco mas bo por bai sin cu Gabinete Wever-Croes ta pone man riba bo placa!
Francisco Figaroa
