SVB a confronta retonan cu e edificio di control di BGD. Cherryldine Buckley, vocero di SVB a splica cu e servicio cu tabata duna na e edificio bieu di BGD den Van Leeuwenhoekstraat, a cera pa motibo di siguridad. Tur departamento cu tabata resorta den e edificio ey, incluyendo e servicionan di Call Center y control di clientenan cu ta bay pa control medico, esta e ambtenaarnan, a cancela na e edificio ey.

A pone aviso den corant y tambe a informa e diferente instancianan concerni, pasobra mester a sali urgente for di e edificio ey.

A busca un solucion temporal, caminda esunnan cu tabata haya e servicio pa control medico, esta e funcionarionan publico ta haya nan control na Eagle, na e edificio oficial di SVB. Esaki ta temporal. A cera e Call Center pa algun dia. Lo bay bek riba dialuna pa duna servicio, pero si a urgi tur hende pa keda uza e AO Melding online. Esey ta hopi importante pa tur hende sa cu tin un AO Melding Online, cu si no haya hende na telefon, por haci’e Online via e Website di SVB.

Trabao a cuminsa mesora pa  busca un edificio pa por muda bay den dje. “Tin bon noticia”, segun Buckley. Falta algun dia mas pa muda pa e edificio di Arulex Building, cu lo bira un edificio temporal. A bisa cu lo tin cu muda aki paar di tempo atrobe. Pero e lo ta un edificio temporal.

Pa otro siman lo informa Aruba, tur cliente y comunidad completo, unda e servicio lo bay ta, cu ta na Arulex, pero tambe e dia cu lo cuminsa. Mientrastanto lo sigui brinda servicio na Eagle.

E Call Center tambe lo ta den Arulex Building. E servicio di Call Center ta vigente. Ta dunando e servicio aki for di diferente oficina cu SVB tin. Pero atrobe ta haci un yamada pa por fabor, si bo no haya ningun hende na telefon, pa haci esaki Online. SVB ta pidi un disculpa pa e inconveniencia cu esaki por a causa na clientenan, pero ta asina, mirando e insiguridad di e edificio, a opta pa saca tur hende for di e edificio. No ta unicamente e servicio di SVB, pero tambe otro servicionan manera di Departamento di Salud Publico, cu mester a reubik’e.

Motibo

Buckley a comenta cu loke ta pasa ta cu e grupo cu ta traha eynan, ta esnan cu ta contesta telefon, cual ta e Call Center. Tambe tin e dokter di control, e parti administrativo y tambe un parti di staff cu tambe ta eynan. Buckley su oficina mes tabata eynan. No ta facil pa haya un edificio nobo pasobra e edificio mester tin cierto rekerimentonan cu mester tene cuenta cun’e. Mester tin espacio pa e parti di ricibimento di e clientenan pa haya control medico. Espacio pa nan sinta. E wachtkamer mester ta uno cu por laga e clientenan sinta aden, cu nan por haci uzo y tin facilidad di baño publico. Hopi biaha ta bisa cu mira un edificio cera of tin un luga. Hopi biaha e personanan cu ta pafo di SVB no sa cuanto material tin cu bay cun’e y tambe e parti di e servicio monetario cu tin cu duna. E aspecto cu tin un luga adecua pa hendenan sinta, baño publico, etc.

A notifica cu e edificio di BGD ta bayendo den mal estado y despues cu a mira cu e edificio ta realmente dunando mas dolor di cabes, und cu ta mira cu e murayanan ta cuminsa kibra. Tabata tin hopi control. Tur hende a bin wak y haci control, a dicidi e ora cu ta pa siguridad di e clientenan cu ta tuma e servicio eynan y tambe siguridad di e propio trahadonan cu mester a muda lo mas pronto posibel. Y actualmente esnan cu pasa banda di e edificio den di Van Leeuwenhoekstraat ta wak tambe cu tin baricada buta. Esey ta indica cu ningun hende no por drenta e edificio.