“Plataforma Raiz a tuma nota di e vonnis di Hof y ta subraya nos posicion pa sostene derecho igual na Aruba”, asina e partido politico, funda dia 9 di juni 2017, a informa riba su pagina oficial di Facebook. Mas bien nan a reacciona memey di tur e opionnan cu a lanta despues di e sentencia di Corte Comun di Caribe Hulandes. Ey tres hues a dicta cu Gobierno di Aruba y di Corsou mester adapta ley di union civil y permiti matrimonio di e mesun sexo.
Den e sentencia, e huesnan ta duna e paisnan tres luna pa dicidi si nan ta acepta e veredicto of si nan no ta satisfecho cu ne, nan por apela na Corte di Casacion na Hulanda. E proceso ey lo por dura algun tempo ainda prome cu yega na un conclusion. Pero den caso cu nan acepta, e ora dia 7 di maart 2023 mes por cuminsa “ondertrouw” y por lo menos dos siman despues, dia 21 di maart 2023, por tuma luga e prome matrimonionan civil di pareha di e mesun sexo, anto cu e mesun derecho cu un matrimonio di sexo opuesto.
“Raiz semper a para pa derecho igual pa tur ciudadano, incluso e derecho pa union. Tanto nos parlamentarionan como ministernan ta traha activamente pa un sociedad inclusivo. Derecho igual pa un miho Aruba”, asina e partido a sigui skirbi riba su pagina den red social.
A hasta inclui un “timeline” den cual nan ta bisa cu for di 2017 cu a funda e plataforma politico, a ancra inclusion y derecho igual den su principionan. E aña aki, na luna di juni, Raiz a uni cu fraccion di Accion21 y MAS pa por yega na un ley di iniciativa pa permiti matrimonio entre pareha di mesun sexo. E tempo ey e mocion no a pasa si, pasobra fraccion den coalicion no a sostene.
Mas despues Raiz ta bisa cu Ministerraad a bay di acuerdo pa introduci cambio den codigo civil pa duna mas derecho na parehanan den union civil. Loke no ta bisa si cu e “mas derecho” cu a aproba no ta locual a pidi y no ta inclui e posibilidad pa por contrae matrimonio di mesun forma cu parehanan di sexo opuesto. Pues, aki no por papia di inclusion, sino mas bien a promove mas discriminacion.
Y awo, na december 2022, Corte Comun di Caribe Hulandes mester a sinta riba stoel di e 21 miembronan di Parlamento di Aruba y toch dicta na fabor di derecho igual pa tur hende, hasta den matrimonio. Pues, dificilmente ningun organisacion politico por “claim” di a haci algo pa parehanan di mesun sexo na Aruba, pasobra den Parlamento unda cu mester a adapta nos codigo civil, no tabatin union y como tal e leynan corespondiente no a pasa. Sino ta pa e huesnan cu a para riba cu ley pa derecho igual ta bay prome cu e deseo di politiconan riba nos isla, cu ainda esunnan di mesun sexo lo ta discrimina den nos codigo civil.
Y ainda falta, pasobra masha poco politico a sali duna nan comentario riba e sentencia di Hof, pa por sa kico lo sosode awo. Pasobra ta e Gabinete Wever-Croes II awor lo mester tuma un decision cu si ta apela na Den Haag of ta laga e sentencia manera cu e ta. Raiz a sali bisa cu nan lo respeta inclusion y derecho igual….pero nan ta apenas dos voto memey di ocho den Conseho di Minister. Con e otro seisnan ta para? MEP lo para banda di e veredicto di hues of MEP lo instrui abogadonan pa sigui bringa y lucha te final pa sigui prohibi inclusion den nos leynan matrimonial. E palabra awo ta den man di e partido mas grandi na Aruba, den ultimo eleccion, pa dicidi futuro di derecho di e comunidad LGBTQ na Aruba.
