Miembro di parlamento y alabes vice-presidente di Parlamento di Aruba no ta contento cu e forma con ta pusha pa WEB Aruba NV core firma un contract multimiyonario pa 20 aña largo cu e compania Eagle LNG di Merca. Den un publicacion ayera riba su pagina di Facebook, Raymond Kamperveen a skirbi cu ta for di mas di un luna pasa caba el a haci pregunta sin cu el a haya contesta t’e cu dia di awe.
Cu e comentario aki por deduci cu no tabatin un “coalitie-beraad” riba e contract dudoso aki, den cual sigur e expertonan na WEB ta totalmente contra. Por lo menos tres director di companianan di utilidad a bay cas, tambe door di motibo di e contract aki, cu nan entodo caso no kier pone nan firma abou!
Riba Facebook e parlamentario a skirbi cu “Den bida nos ta siña hopi cos na diferente scol of na e miho universidadnan di mundo. Nos ta siña di proceso y leynan cu nos como cuidadano mester tene na cuenta of mester aplica den nos bida. Pero e ta incomprendibel ora cu bo ta atene bo mes na proceso y leynan den Parlamento di Aruba y otronan no. Esaki ta mi preguntanan over di situacion di Eagle LNG, Utilities N.V., WEB N.V., RdA N.V. cu e fecha 5 november 2021 for di Parlamento di Aruba”.
Como cu ya nos ta riba dia 9 di december caba, anto facilmente por conclui cu pa un luna largo a opta pa no duna e parlamentario hoben e respet necesario pa ni sikiera contesta su preguntanan cu el a haci, siendo partner den coalicion. Probablemente e partner grandi den e coalicion a imagina cu como “junior partner”, cu e fraccion di Raiz lo no haci mucho ‘fastioso’ y lo bay di acuerdo con cu ta toch. Pero, awor ta mustra cu por lo menos un parlamentario, den e caso aki Raymond Kamperveen, lo no kier bay den historia como esun cu a duna aprobacion silencioso pa mara nos pais pa dos decada den un aventura di gas. Pa e articulo completo, lesa e edicion di TREMPAN di awe.
