Milco Baiz ta consehero di Minister di Husticia y despues di e lantamento diamars den oranan di atardi, a acudi na warda di Guarda Nos Costa na aeropuerto pa papia cu e detenidonan.
Baiz a splica cu Minister a pidi pa scucha kico ta tur e kehonan y pa informa nan cu Gobierno debidamente ta haciendo tur esfuerso pa trata di convence Venezuela pa acepta vuelonan di repatriacion pa e grupo di personanan aki cu tin sigur 6 luna sperando pa manda nan bek nan pais.
Recientemente Gobierno di Aruba a pidi intermediacion di Hulanda tambe den e asunto aki pa mira si via Minister di Hulanda por logra yega na un acuerdo. Na mesun momento Baiz a scucha kico ta e otro preocupacion di e detenidonan, kendenan ta papia di un trato inhumano y un area unda nan ta cera cu ta laga hopi di desea. Baiz a bisa cu un biaha mas e lo hiba e informe pa e mandatario, kende ta na altura caba di e situacion y a haci acuerdonan caba pa loke ta mehoracion di e instalacion.
