E asunto di Conoco Phillips y caso di arbitrahe a yega Aruba tambe. Tur esnan cu tin relacion cu PDVSA por conoce beslag riba loke PDVSA saca for di Venezuela.
Na Bonaire el a pasa y tambe na Curacao nan ta man na cabez cu e refineria. Asina mes nan ta keda positivo. Mientrastanto crudo cu ta pasa Aruba tambe a pone beslag. Na Aruba barco ta descarge den tanki e crudo. Den tanki ta saca e awa for di e azeta crudo. Ora e azeta ta seco sin awa ta hinke den otro barco of mesun barco y manda Merca pa e refinerianan di CITGO.
E barco Grymstad a drenta diadomingo anochi cu 500 mil bari di crudo. E ta destina pa CITGO. A cuminsa descarga pero a suspende esaki riba ordo di abogado. Abogadonan di Conoco Phillips a usa deurwaarder local y abogado pa representanan na Aruba. Un otro tankero Atlantic Lily cu a trece Jet Fuel, Diesel y Gasolin pa RdA tambe nan a pone beslag riba e barco. A baha solamente e carga destina pa RdA pa consumo local. E barco aki ta ancra awor pafo di Aruba pero den beslag. E ta den anker area di nos awa teritorial. E barco Atlantic Lily tin algo mas cu un siman y mey caba den beslag.
Ainda tin 7 cargacion di crudo mas cu mester bin pa CITGO pero awor mirando e situacion, e chens ta grandi cu ta stop esaki. Esaki pa motibo di e situacion tenso entre Conoco Phillips cu PDVSA. Esaki ta despues di e sentencia di arbitrahe cu a tuma lugar. E embargo ta basa riba incumplimento di PDVSA pa cu Conoco Phillips. Cos ta pintando scur e momentonan aki. Pa loke ta e situacion local nos no tin problema. No tin motibo pa conoce problema pa Aruba cu Gasolin, Diesel of Jet Fuel. Esey ta cosnan cu lo wordo regla y lo sigui normal.
Entre e trahadornan mes ningun hende sa kiko ta pasando. Paden cos ta keto y no tin problema cu cobramento di salario.
