Awe marduga pa mas of menos 12:30am a fayece e conocido trompetista profesional, Eduardo Rafael Maya Agreda, naci na Colombia, dia 17 di januari 1943, pero bibando pa e ultimo 53 añanan na Aruba.
El a fayece na su cas mes, despues di un lucha largo cu retonan cardiaco y bringando diabetismo.
“El a muri trankil”, asina su yiu Nancy Maya a bisa nos awe mainta trempan. Eduardo ta bay laga atras e mama di su tres yiunan, esta Felepina Tromp, hunto cu e yiunan Nancy Maya, Cynthia Tromp-Maya y Eduardo Maya Jr. Banda di su yiunan, como welo e ta masha stima pa e nietonan Alan Lesker, Dara Tromp, Asher Tromp y Xiara Maya.
No mas cu dos aña pasa, e organisacion Carlos Bislip’s Jazz Expo a reconoce e musico Eduardo “Lalo” Maya pa su contribucion na e panorama musical di Aruba pa e ultimo 50 añanan.
Cu Eduardo Maya sosega na paz. Hopi forsa na su señora, yiunan y nietonan den e momento dificil aki.
