Trahadonan di Parke Nacional Arikok ta buscando nan derecho laboral cerca sindicato SEPPA. Shopsteward di SEPPA, Yen Eckmeyer, cu tin mas di 20 aña trahando na e parke, a indica cu nan tabatin un propocision riba mesa. Ta pa e motibo aki mes nan a reuni diaranson. Tin cu warda si te cu diabierna pa wak ki decision lo wordo tuma y mira kico lo bay haci. Parke Nacional Arikok ta consisti di casi 50 trahado y nan ta canando pa nan derecho.
Berdad tin basta tempo cu nan tabata pidi pa un reunion y al fin y al cabo esaki a tuma luga. E reunion a bay bon y a haya hopi splicacion. Sin embargo, cos no ta pinta mucho bon pa e Fundacion. Loke nan ta buscando ta e oido di gerencia. Siman pasa diabierna tambe tabata tin un reunion cu e trahadonan, cual a bay hopi cortico segun e Shopsteward. Nan a bin cu un proposicion riba mesa cual a sali diahuebs anochi y pa ora e trahadonan a yega mainta, nan mes no tabata sa di dje.
Segun Eckmeyer, tin cosnan cu nan kier mishi parti, y esey ta loke e trahadonan no lo tuma. Nan no ta acepta esey. Tin preocupacion pa loke ta e futuro di Parke Nacional Arikok. Eckmeyer a menciona cu e ta haya straño cu tin cosnan cu a wordo papia, mirando su trayectoria den e parke y no ta compronde di cierto cosnan cu gerencia ta papiando. Esey ta loke ta preocupa e trahadonan, pasobra tin cos cu no ta cuadra.
Awo ta djis sinta warda pa diabierna pa asina evalua kico lo ta e siguiente pasonan. Te asina leu no por bisa si lo descarta un accion mas grandi. Tur cos ta depende di e decision tuma diabierna, ta loke cu Yen Eckmeyer, Shopsteward a indica por ultimo.
