Ta increible pa mira den ki gasto Hospital a hinca su curpa aden. Cu rason Ezzard Cilie director di Hospital mester a entrega y tira e bala den scochi di minister Dangui Oduber. El a bisa pa e minister mes busca un solucion pasobra e no por mas. Cu rason e no por mas. Loke cu a sali afo di e problema di Hospital tabata cu Hospital a faya y laga di desea cu su mantencion.
Hospital a busca un compania priva atrobe cu conocimento den tuberia pa bin yuda den e desater cu a crea pa falta di mantencion di nan mes. Den e buskeda a topa cu un area full geplug. E area aki ta net den porta principal di Hospital. A coba y yega na e tuberia hancho. Eynan a corta e tubo y djey a topa cu e realidad di tur e problema. A saca sushedad cu a aglomera den e tuberia. Cu tempo e sistema a plug y seca di tal forma cu ningun awacero pisa por a los e sushinan cu a bira manera piedra. Hopi yerba cu lodo etc a bira e obstaculo den un sistema di drenahe principal pa awacero. Si awacero a sigui cay ta otro desaster tabata tin.
E awacero cu ta baha via dak ta drenta den e tuberianan y bin abou den diferente area pareu. Mas abou e ta topa cu e tubo grandi y sigui su caminda bay afo. Si e sistema ta pega, henter e sistema di tuberia ta yena cu awa. Ta crea asina un peso grandi cuasando peso y presion den e sistema. Pesey e tubo a kibra. E sistema ta traha pa e awa pasa bay sigui su caminda ta na final. E no ta traha pa yena cu awa y carga e peso pasobra e sistema ta geplug cu sushi pa falta di mantencion.
Cu otro palabra, Hospital mes a faya pasobra loke a sosode a cay bou di nan responsabilidad. Un tiki mas atencion na mantencion por a evita tur e cosnan aki. Awor e gastonan ta hopi pa por a trece un contratista specializa aden pa coba y corta pa yega na e partinan cu a pega cu hopi sushi. E imagennan aki mes ta confirma tur loke a ser saca.
