Cortamento den cuido medico ta preocupacion den comunidad. Ta papia cu lo corta den dentista y tambe fisioterapia. A combersa cu varios ciudadano a expresa nan pensamento kico lo ta mas conveniente pa nos comunidad.
Herman Reyes a comenta di no ta di acuerdo cu e cortamento. E ta sigui bisa cu e mes a haya problema cu su oido y a opera algun biaha. A prefera di oper’e na Aruba mes y esaki no tabata exitoso.
A bin un dokter fo’i Venezuela, kende a logra scapa su oido, contrario cu e prome dos dokternan cu a causa daño.
No ta beneficioso pa e comunidad, Reyes ta splica, pasobra salubridad ta necesario. “Mester di un ayudo financiero. Supuestamente Hulanda ta bin financia, pero mi no ta di acuerdo cu e cortamento,” Reyes a comenta.
Tambe Reyes ta comenta cu e pandemia a afecta su negoshi pa casi dos aña. Mirando cu su tempo ta limita, e no tin mucho tempo pa mira noticia, pero tin biaha e ta mira tur loke ta pasando rond y e ta nota cu pueblo ta cobra menos, pero ta paga mas pa cuido medico.
Martin Haselhoef tambe tin su pensamento riba e hecho aki. E ta conta cu manera e situacion ta caba, si bin mas cortamento, e ora ey e no sa unda nos lo caba.
Ya caba e salario, loke un hende ta haya no ta yega pa nada.
Irene Tjon-a-Fat, un pensionado, a menciona cu e no sa kico lo bay pasa. E cortamento den cuido medico lo tin consecuencia pa nan. “Nos no tin un pensioen grandi y despues nos mester bay paga, nos no por,” ta loke el a comenta.
“Aruba ta confrontando un situacion caminda cu e cartera ta preta y cierto cos lo bira necesario,” ta loke cu Herbert Diaz a menciona. Ningun hende kier cortamento, pero si no tin placa, kico lo haci.
Diaz a menciona cu tin cu baha gasto. E ta convenci cu den henter cuido medico tin hopi malgastamento di placa.
E ta sigui conta: “No pa critica negativamente, pero hospital su administracion no ta efectivo. Tin hopi fayo eyden.”
El a menciona cu el a scucha dr. Falconi den un programa di television bisando cu 50% di e gastonan medico ta bay pa hospital. Ey mester bin un revision profundo pa scapa gasto. Tin otro cos tambe. “Nos por pasa pa importa remedi generico cu ta aproba pa FDA na Merca. Tin dos tipo di remedi generico. Tin esunnan cu no ta proba, cu por cumpra liber na China por ehempel, y esey ta hopi peligroso. Pero tin cu ta aproba. Tin remedi generico cu ta baha prijs di remedi y ta mes bon cu esunnan di marca. Esey mester haci.”
Otro cos cu Diaz a menciona ta cu te caminda cu e sa, cu AZV ta un seguro cu no tin un departamento di control externo. Diaz a menciona cu nan no tin un departamento den control externo. Zip si tin e, segun Diaz, kende a afirma cu el a yega di traha pa nan. Nan tin un departamento di control interno y uno di control externo.
A yega di papia cu hendenan di AZV di Colombia y a bisa cu nan ta controla nan gastonan bon. Ora a puntra nan kico t’e secreto, a haya sa cu control externo. Ta bon pa AZV revisa nan ley y bin cu un departamento di control externo. Cu e tres cosnan ey caba por baha gasto.
Pa cobertura mas amplio lesa edicion di TREMPAN mañan.
