Competencia di tiro e fin di siman aki na Wela organisa pa Aruba Practical Shooters Club

E fin di siman aki Aruba Practical Shooters Club ta organisando e di 25 aña di Aruba Open. Aruba Practical Shooters Club tin 25 aña di existencia cual nan lo ta celebrando en grande e aña aki.

Segun miembro di APSC, Edward de Cuba, nan tin competidornan cu ta bin for di mas di 10 pais, entre otro Surinam, Ecuador, Chile, Colombia, Venezuela, Merca. Tambe nan tin mas of menos 100 tirado, incluyendo esnan di Aruba. Mas of menos 60 tirado di afo ta bishitando nos pais pa bin competi den e Aruba Open.

Esaki sigur ta un logro basta grandi cu pa 25 aña a logra di mantene cu fondonan hopi limita y buscando miembronan nobo tur aña.

Ora cu ripara cuanto amistad y atletanan di afo ta biniendo, por bisa cu esaki ta algo hopi bon. Por ripara cu tur ta ruman den e deporte aki y di tur parti di mundo nan ta bin pa sostene Aruba den e deporte y atletanan di Aruba tambe ta bay bay pa e competencianan grandi.

Pueblo general di Aruba ta bon bini pa bin Wela. Tur hende cu ta interesa den e deporte, sea pa wak, pa competi of djis pa tin mas informacion di dje, por bin diasabra y diadomingo parti mainta. Semper tin un miembro di directiva disponibel pa duna informacion.

Por sinta wak e competencianan. Bin cu un bril y si bo tin algo pa tapa horea, pa siguridad. Tur ta cana cun'e, tur tin'e. Ta bay tin bar y cushina bon surti. E ta algo pa full famia tambe. Tin tiradonan hubenil, tin tiradonan den damas, den tiradonan mas madura sea 50+ of 60+, depende ki categoria. Tin pa tur hende. Por participa tambe den tur forma, de Cuba a bisa por ultimo.