Comerciantenan local a sinti falta di representacion di nan bos ora cu gobierno tabata tilda comercio den debate di reforma fiscal pa cobransa di BBO. Comerciantenan tabata haci cosnan ilegal door di cobra BBO den e prijs. Pa diesdos aña ta cobra asina incluso pa empresanan di gobierno mes tabata cobra separa.
Di mira e custumber di pone pueblo contra nan ta frustrante. P’esey comerciantenan a dicidi di busca representacion y hunto cu mas gremio comercial a manda un carta pa gobierno. E intencion di CUA ta pa sigui representa comercio y busca mas miembro pa por lucha bay dilanti, asina Francis Saladin, secretario di organisacion, a bisa.
E organisacion a registra na Camera di Comercio cu nan statuto y tambe ta den proceso pa habri un cuenta bancario. Esaki ta pa nan promove y participa den dialogo entre miembronan di e sociedad, partinan social, tanto na Aruba como exterior. Tambe pa nan papia cu gobierno y defende interes di miembronan, defende interes general y desaroyo di Aruba, asina Randal Croes, tesorero di organisacion, a splica di nan statuto.
Comerciante Uni a traha un app y den un tempo di dos siman esaki lo ta riba AppStore. Segun Fransje Ponson, presidente di organisacion, nan ta hopi innovativo pasobra cu e app aki ta revisa online y e comerciante ta registra su number di KvK, nan ta esnan cu sea ta aproba of no ta aproba. Unabes cu e comerciante drenta e mainscreen di e app, por haya informacion di tur cos. Cu esaki constantemente lo tene miembronan up to date kico tur ta pasa.
