Durante e presentacion di Partido di Pueblo Arubano AVP su 10 puntonan pa trece prosperidad bek, paz, goso den curason, mente y cartera, candidato Clifford Heyliger a amplia riba esun prome. Esta pa trece un alivio rapido, controla e costo di bida y formalisa, den cooperacion cu Hulanda, un institucion cu ta monitor e realidad socio economico di nos pais.
Heyliger ta kere cu pa medio di ignora e situacion actual, Gabinete Wever-Croes kier haci como cu e deficit den poder di compra no ta existi. Mientrastanto e ciudadano tin cu wak bon ora di haci compras pasobra ya e no por cumpra loke e ta desea, pero loke placa ta yega p’e. Mayoria mama y tata di famia tin mester di dos trabou y asina mes e salario no lo yega pa henter e luna. Tin biaha hasta welo y rumannan tambe mester traha pa yuda.
Pero mientras Partido AVP ta plania pa mehora, parlamentario Tromp-Yarzagaray ta parce di no ni sikiera ta compronde kico e bestaansminimum ta representa, Heyliger a comenta. Esta cu esaki ta e punto di salida pa midi e grado di pobresa den bo poblacion. E ta splica cu si bo salario minimo y bo pension no ta yega pa cubri e minimo pa biba, bo ta simplemente creando pobresa den bo pueblo.
E situacion aki ta keda crea un buraco mas grandi y mas dificil pa sali for di dje, segun e candidato di AVP. Heyliger ta bisa: “Tin un diferencia entre smart shopping y forceful shopping. Nan ta forsa bo di cumpra cos aunke no ta esun mas saludabel of miho, pasobra e placa no ta yega.”
AVP kier pa e famia Arubiano no mester haya stress pa placa, pa con ta bay paga pa cuminda, pa gasolin, pa schoolgeld, pa remedi, ni tampoco con pa diverti maske ta un bes pa luna den famia. Tanto bal e gobierno actual ta gaba cu surplus aki aya y pueblo ta pasa hamber. AVP no ta djis wak cifra y buki, AVP ta wak e 100 mil y pico hende y ta pa e ser humano ta traha un desaroyo economico.
Unda tin vision y tin curason pa hende, un pais ta progresa. Esaki ta loke bo tin den e partido AVP. “Pueblo cos ta duro y ainda falta un tiki pa bay, pero nos ta bay bolter cos. E ora ey di berdad ta bay sinti den curason, mente y cartera e pas y goso cu mirada pa futuro. E tempo ta yegando.” Asina candidato Clifford Heyliger a finalisa bisando.
