Diahuebs dia 21 di November Fundacion Pa Nos Muchanan (FPNM) cohuntamente cu Enseñansa pa Empleo a clausura su curso pa personan cu tin e deseo pa habri nan Centro di Cuido di Mucha. Pa 10 siman largo 16 cursista hopi entusiasma y motiva a participa na e curso cu e meta pa haya e informacion necesario pa por habri nan propio centro di cuido y guía di mucha.
Durante e prome modulo’ E centro’ cursitanan a recibí informacion tocante loke un centro di 0-12 aña ta encera, e bienestar di e muchanan y con pa traha un menu balansa cu a ser duna pa Sra. Ebrina Curret (dietista DVG). E di dos modulo ‘E cliente’ a trata e fasenan di desaroyo y e base di comunicacion entre trahador, mayor y un mucha cu a ser duna dor di Sra. Swinda Dumfries (Orthopedagoog DVG). Den e ultimo modulo 3 ‘E centro un negoshi’ a trata e aspectonan organisatorio, financiero y jurídico. Cursistanan a recibi informacion tocante e Maneho pedagogico den un centro, informacion tocante un ‘Start up business’ cu a ser duna dor Geraldine Bardouille y Maria Laura Figaroa di Qredits Aruba. Ademas di esaki nan a haya un les intensivo di con pa traha nan propio prosupuesto pa nan negoshi cu a ser duna pa Sra. Layhing de Kort di ‘Cornerstone Economics’. Derechonan como un trahador tambe ta algo hopi importante y Sr. Andres Dirks di Departamento di Labor a duna informacion tocante esaki.
Sra. Sue-Ellen de Freitas Sousa di KVK a elabora tocante e rekisitonan pa lanta un negoshi.
Por conclui cu e cursistanan a recibi informacion amplio riba tereno pedagogico, cuido, organisatorio, financiero y tambe riba alimentacion.
Fuera di e lesnan aki e cursistanan nan a haci un pasantia cortico na un ‘Kinderopvang’ y un Traimerdia pa asina nan haya un bista di loke ta un Centro di Cuido den practica ta encera.
Como tarea final, e cursistanan mester a traha un plan di accion cu e diferente topiconan cu a recibi durante e curso y pa clausura un examen.
FPNM kier a gradici tur esnan cu a aporta na curso aki cu nan tremendo presentacion y na mes momento nos kier a felicita tur e cursistanan cu a participa y a sigi e trajectoria aki. Teniendo cuenta cu tur e aspectonan di calidad cu a enfatisa durante e curso, nos ta spera cu nan por sigi cu nan meta pa asina logra nan propio Centro di Cuido di Mucha.
