Manera nos a publica den forma exclusivo desde diadomingo caba, awe dialuna mainta, despues di hopi presion interno den MEP, Luigi Bergen a anuncia su retiro “temporal” for di Parlamento. Conocedonan politico ta considera esaki un “novum”, pasobra e posicion ey no ta temporal y ta keda na Darlaine Guedez si e lo sali ora cu Bergen “ta cla” cu e caso penal contra dje.
Pa loke ta e retiro “boluntario” for di Fraccion di MEP den Parlamento, esey a bin despues cu su ex casa y su yiu muhe a keh’e na Ministerio Publico y awo ta tratando e caso den su contra. Esey mientras cu Bergen a gaña publicamente cu no tin ningun caso contra dje, a presenta cu un certificado di bon conducta di Ministerio Publico pa su nombracion como Parlamentario, siendo e tabata bon na altura cu tin un keho penal contra dje na recherche!
Ironia ta cu net awe cu el a anuncia su retiro, ta dia cu ta observa Dia Internacional di Eliminacion di Violencia contra Hende Muhe of Dia Internacional di No Violencia di genero.
Awe mundo henter ta observa e dia pa elimina abuso contra hende muhe
Dia Internacional di Eliminacion di Violencia contra Hende Muhe of Dia Internacional di No Violenia di genero, ta conmemora anualmente riba dia 25 di november pa denuncia violencia riba hende, discrimina pa su genero, (mayoria bez violencia eherci pa e hende homber contra hende muhe) rond mundo y ta reclama maneho den tur pais pa stop e tendencia aki. E movimento feminista Latinoamericano a inicia e convocatorio na aña 1981 conmemorando e fecha caminda cu na aña 1960 a asesina e tres ruman muhe Mirabal (Patria, Minerva y Maria Teresa) na Republica Dominicana. Na aña 1999, Asamblea General di Nacionnan Uni den su resolucion 54/134 dia 17 di december di 1999 invitando gobierno, organisacionnan internacional y organisacionnan no gubernamental (NGO’s), a convoca actividadnan dirigi na sensibilisa opinion publico riba e problema di violencia contra hende muhe.
Violencia contra hende muhe a bira un problema structural. E dia ta dirigi na hende muhenan cu e obhetivo di elimina nan subordinacion na e genero masculino. Su origen ta den e falta di equidad den relacion entre hende homber y e hende muhe den diferente ambito y den e discriminacion persistente contra di e hende muhe. Ta trata di un problema social presente, tanto den e ambito domestico como den esun publico, den diferente forma: fisico, sexual, psicologico, economico, cultural y otro y ta afecta e muhenan desde nacimento te cu edad avansa. E no ta mara na un cultura, region of pais specifico, ni tampoco na gruponan specifico di hende muhenan den sociedad.
E combate contra violencia di genero tin un dimension politico importante, segun specialistanan di diferente ambito. Entre e clavenan pa lucha contra volencia contra e hende muhe y avansa den e prevencion, ta educacion y un contesta adecua di husticia cu ta evita impunidad. Alcansa e igualdad di genero ta pasa necesariamente pa “transforma e reglanan social” y e rolnan cu ta subordina e hende muhe.
E forma mas comun di violencia experimenta pa hende muhenan na nivel mundial ta e violencia fisico, haci pa un pareha intimo, loke ta inclui muhenan golpia, obliga na tene relacion sexual of victima di algun otro forma di abuso. Entre e formanan cotidiano di violencia contra e hende muhe – Nacionnan Uni ta denuncia – ta haya tambe entre otro traficacion di hende muhe, mutilacion genital femenino, “homicidio di honor” y violencia sexual den conflictonan.
Te cu 70 porciento di hende muhe ta experimenta violencia den transcurso di su bida.
