Den fin di siman tra’i lomba, Claudius Philips y su grupo OREO tabata na nos isla ruman, Corsou. Un invitacion cu e biaha aki a inclui no solamente e banda pero cu a inclui nos team di farandula cu a compaña e banda musical aki pa asina presencia un poco di locual cu ta un presentacion di Claudius y OREO den region.
Nan tabata t’ey riba invitacion di e sindicato di empleadonan publico di mas grandi di Corsou, esta ABVO cu tabata encarga cu tur detaye di e fin di siman y presentacion. Sublime ricibimento manera semper for di nos rumannan di Corsou cu a trata cada invitado tremendamente. Manera na cas.
Pa locual tabata trata e evento, e anochi di fiesta den Bahia, tabata relaciona cu 87 aña di existencia di e sindicato caminda a manda un invitacion na su miembronan y cu a conta cu aproximadamente 2500 hende presente na e anochi di gala y ambiente den Mathey Werf den Bahia.
Tin di bisa cu e tabata un orguyo masha grandi pa observa con Corsou a ricibi, atende y responde na Claudius Philips y OREO, con a biba cu cada cancion cu nan a presenta. Letra pa letra a canta cada cantica y e psita ningun momento tabata bashi. Durante break, ta masha hopi hende a probecha pa bin saluda, saca nan portet, busca un brasa y felicita Claudius pa pone e ambiente unico cu e so por pone. En berdad Claudius ta un persona masha stima na Corsou.
Den e frontline di e banda por a aprecia algun cara cu sigur no ta desconoci ni na Aruba y ni na Corsou, ta trata aki di Papito Rafael cu tambe a biaha for di Aruba pa bin reenforsa e banda, for di Corsou a presenta tambe Reinier Lijfrock cu ta gran amigo y un parti esencial den e makinaria di cantante poderoso, ademas di Diana Emerencia ( Lady Eyes) y Claudius Philips mes.
Claudius a indica durante su entrevista, cu desde cu el cuminsa su carera artistico, semper e pueblo di Corsou a carg’e y a stim’e. Algo pa cual e ta hopi gradicido. Y p’esey cu cada biaha cu e tin e oportunidad, cu e ricibi un invitacion, cu e yega Corsou, e ta presenta cu masha cariño.
FESTIVAL OTI A BIN DEN MENTE
E aña aki, pa casualidad, ta haci cuarenta aña cu Claudius a representa Antias (e tempo ey) den e OTI Festival, unda cu el a termina na di dos luga. Ta recuerdonan cu a bin den mente na momento cu a yega Corsou y a haya chens di sinta hunto cu e banda pa combersa un rato.
CANCION MAS GUSTA
E manera cu nan ta ricibi OREO na Corsou, ta algo sumamente gratificante pa un artista. E ta spera cu e por haci esaki pa hopi aña mas. Ta di admira e pueblo di Corsou cu ta un pueblo cu ta canta cada un di e cancionnan di e cantautor Arubiano, Claudius Philips.
Pa Claudius esaki ta algo masha bunita, ya cu p’e Dios a bendicon’e cu e talento cu cada cancion cu e presenta, esaki ta keda pega den mente di e hendenan y nan ta cant’e cu hopi sentimento. Algun di e cancionnan cu mas e pueblo ta gusta ta Habri bo brasa, Bouquet di Flor, Paga e luz.
MAS PRESENTACION
Claudius Philips a indica cu durante sound check, eynan mes el a haya tres diferente invitacion pa bin haci su presentacion na Corsou. Cu un curason agradecido e ta birnda semper lo miho di dje y su banda mescos, como cu e oportunidadnan aki no ta yega sin dedicacion y sacrificio. Y e acogida aki sigur pa e artista, ta algo pa cual e no tin palabra pa gradici e amor y sosten cu Claudius y OREO ta ricibi for di e pueblo di Corsou.
PLAN PA FUTURO
Mas aleu, e artista local a indica cu e tin plannan grandi pa e aña aki. Tin varios cancion cu lo mester sali durante 2023. Un di nan ta un cancion cu el a compone e dia cu su señora mama a fayece. E cancion lo sali den e proximo dianan y cu ne tambe lo sali su videoclip. Henter e cancion tin su storia rond di dje. Lo presenta e cancion tanto na Aruba, Boneiro, Corsou.
Riba plan e tin tambe presentacionnan tanto na Boneiro como Sint Maarten, ademas di Corsou. Pero tambe OREO lo tin presentacion na Hulanda cu lo bira uno cu ta look forward riba dje. Ta bay ta un aña hopi druk pa OREO e aña aki. Na september, e lo cumpli c’un promesa haci na su mama y manera Claudius mes a bisa cu a yega su tempo pa esaki. Na su momento, lo duna mas informacion di esaki.
OREO
E aña aki ta 32 aña di existencia di Claudius & OREO y e ta spera cu e por sigui haci e trabou aki pa hopi aña mas.
REPERTORIO
Pa loke ta su repertorio,
Claudius a scoge su cancionnan mas conoci. Como musico bo ta presenta cancionnan cu ta mantene e hendenan riba pista. Tur cos ta depende di e personanan n’e fiesta. Semper, como artista, ta bon pa e tene e publico bailado na cuenta y tene cuenta cu e sorto di musica, di cancion cu mas nan ta gusta. Si tin un publico mas jong, ta cambia e repertorio un poco. Como artista, bo mester ta multifacetico y traha cu e publico bailado.
KEN TA CLAUDIUS PHILIPS
Claudius Philips ta un compositor, areglista, pianista, cantante, productor y un entertainer. Na aña 1983 a coron’e como Rey di Calypso pa prome bes, cu su calypso “The Surprise”, cu a dun’e un boost den su carera musical.
Claudius ‘Mighty Talent’ tin un record den Calypso y Roadmarch Contest. El a participa 25 biaha den e festivalnan, 13 biaha el a gana tur dos corona, 20 biaha a sali Calypso King y 15 biaha Roadmarch King. E ultimo biaha cu el a gana un titulo ta na 2014 cu e cancion “Carnival Cheezy”.
Na aña 1992 el a lanta su mesun banda, One Real Exciting Organization (OREO), cu a hacie mas popular cu varios hit manera: ‘Saca e Boem’y ‘Haciendo cos romantico’.
Na februari 2020, Minister di Cultura, mr. Xiomara Maduro, a reconoce Claudius Philips pa su gran aporte na cultura di Aruba.
