Elizabeth Roga ta hopi rabia cu gobierno. Henter e situacion cu FASE ta bruha y consecuentemente e no ta ricibi su pago tur luna.
E ciudadano tabata mustra hopi rabia y frustra cu henter e situacion. El a splica cu e tin su mesun negoshi chikito y tin esaki registra na Camara di Comercio. Continuamente e ta yama e number cu a duna pa comunica cu esnan di FASE, pero nada pa splic’e kico a pasa cu su caso number 5680. Niun contesta e ta haya.
Awo e ta den un situacion dificil pasobra e no a haya ningun pago e aña’ki ainda. “Ta basta. E placa no ta sali for di gobierno su saco. E ta placa cu ta bini di Hulanda. E no ta husto. Gobierno ta kere cu e por duna solamente esnan cu kier y esaki no ta husto.”
El a bay te hasta Parlamento pa papia cu algun persona y tur hende ta bis’e yama e number cu e tin pero no ta haya contesta. “Mi tin derecho pasobra semper di mi bida mi a traha. Nunca mi a cobra onderstand. E cos aki ta inhusto, mi ta malo y tin cu cana tras di minister y ta cunsumi mi mes. Mi ta un sobreviviente di cancer y no por bay traha den turismo y infecta mi mes cu COVID,” el a bisa.
E suma cu gobierno ta duna ta yuda pero e no ta tapa tur buraco. Gobierno ta bisa cu nan ta yuda hende, pero e no ta hayando nada. P’esey e ta pidi pa Hulanda tuma Aruba over pasobra asina ta caba cu Friends & Family. “Mi ta cansa cu e forma aki. Ta trata nechi pero mi cana a yega. Bisti mi sapato pa sinti loke ami ta pasa den dje,” e señora a duna di conoce.
