Despues di tabata sufri un kebrante di salud e ultimo siman aki, awetardi Maria “Mai” Anette Maduro-Lampe a fayece na Dr. Horacio E. Oduber Hospitaal, na edad di 109 aña. Te cu awe e tabata e habitante mas bieu di nos isla.
Dia 26 di Mei 1909, Willem Hendrik Lampe y Felipina Lampe-Maduro a haya nan yiu muhe Maria Anette Lampe, kende pa hopi tabata yama pa cariño Mai. Anette a casa cu Mauricio Maduro y nan a haya diescinco yiu, di cual recientemente 1 a fayece. Anette Maduro-Lampe ta un señora fuerte, perseverante y a bira viuda cu su 55 aña di edad. E no a rindi y a lucha bay dilanti pa saca su famia padilanti. E ta un persona balente y nunca e tabatin un trabou, pero semper a traha duro na cas cuidando su famia y a lanta tur cu amor. Pa henter e famia, Anette Maduro-Lampe tabata un ehempel, pasobra e ta un luchado y tur dia por mira esey.
E famia di Anette Maduro-Lampe a crece y awendia tin 5 generacion, consistiendo di 15 yiu, 50 nieto, 79 bisanieto y 60 tataranieto. Tur su generacionnan el a lanta cu norma y balornan, tambe a mustra tur kico ta e bon y malo. Anette tabata un persona cu semper a lucha y boga p’e union den famia keda estrecho, pero tambe cu tur hende den e famia semper t’ey pa otro. Tur hende por mira e amor y union entre tur su yiunan.
Hopi forsa na famia Maduro den e momentonan dificil aki. Cu Mai sosega na paz.
