Tin 54 caso nobo cu a bin acerca den 489 test haci y tin 7 pashent cu a recupera, asina Prome Minister mr. Evelyn Wever-Croes a anuncia awe pa loke ta e cifranan di Departamento di Salud Publico (DVG) di e testnan di awe. Esaki ta trece na total di caso activo di 898 di cual 16 ta no residente, pues turista y studiante y e demas 882 ta nos propio residentenan.
“Te cu awor aki esey ta e cifranan y te cu awor aki tin 11 hende den hospital, di cual 2 ta den Intensive Care”, tabata palabranan di Minister Presidente cu un bos serio awe ora di anuncia resultado di testnan haci.
E virus tey, segun prome minister. E riesgo pa contagio ta real. Pesey ta pidi pa keda paden mas tanto cu ta posibel. Ban cuida nos mes, ban cuida nos famia, pa asina nos por cuida Aruba.
Berdad e cantidad di casonan cu tin na Aruba ta hopi halto. Esaki ta debi na e strategia di test agresivo cu tin. Esaki ta e strategia cu tabata tin na principio y ta esun cu continua cun’e.
Mas test, mas caso positivo cu haya. Y gran mayoria di e personanan te ainda, no ta sinti malo. Otro paisnan ta test ora cu hende ta sinti malo y logico cu nan cantidad di casonan positivo ta hopi mas abao.
Aruba a scoge pa e strategia di search and destroy y e volumen halto di test ta duna e resultado aki. Esaki bo tin cu haci segun mas brote tin, mas test bo tin cu haci tambe.
Loke a demostra cu na Aruba nos capacidad ta prepara y a responde. E mas improtante ta pa sigui responde tambe.
A haci palabracion cu Hulanda y diasabra a yega un team di cuido specialsa pa amplia nos capadidad di personal di cuido. E gastonan di e personal concerni, Hulanda ta carga cun’e. Aruba mester carga cu e gastonan di transporte y alohamento.
Mirando cu nos tin 11 persona den hospital di cual 2 den Intensive Care, ta e motibo cu nos mester di mas personal specialisa den Intenstive Care. Gobierno ta hopi contento cu a haya e ayudo aki tambe. Esey ta bon noticia, pues nos ta miho prepara ainda. Ta sigui monitorea cada aspecto di e crisis di Covid-19 pa asina por responde tempran y controla cualkier escalacion.
No ta e pais di mas grandi, di mas poderoso sino ta e pais mas disciplina. Ban cumpli cu e reglanan y keda paden mas tanto posibel. Keda cu e distancia di otro hendenan, uza mondkapje y aplica reglanan di higiena.
Prome minister tin tur confiansa cu nos lo logra.
