E preocupacion ta grandi, segun presidente di Parlamento, mr. Juan “Ady“ Thijsen. Durante di un reunion di Parlamento, el a splica cu e kier a pone puntonan hopi cla den e relacion entre Hulanda y Aruba, pa cu e condicionnan impone pa logra fiansa pa nos isla. Punto 1 ta: Cu nos ta un estado di derecho. Mescos cu Hulanda, Aruba tambe ta. Tin cu respeta esey. Hulanda kier negosha cu Gobierno di Aruba, haciendo comosifuera Parlamento di Aruba no ta existi y esey no por, segun Thijsen.
E di dos punto ta, cu nos ta bezig den un situacion di calamidad y hopi biaha nan ta perde esey tambe. Nan ta haci mescos nos ta bibando den un situacion normal, pero ta den calamidad nos ta bibando awor aki cu tur su consecuencianan.
Thijsen a pone enfasis riba Hulanda y ta purba di haci’e obhectivamente pasobra e ta kere cu nos tin cu analisa e comportacion di Hulanda den e situacion aki.
Hopi pais den Union Europeo tin e mesun problema cu Aruba. Mesun consecuencianan di Covid-19. Nan a sinta delibera, yega na acuerdonan pa yuda nan den Covid-19. Nan a yega na acuerdo, nos tur sa esey. Paisnan manera Italia, paisnan manera Spaña a haya 100 pa 200 biyon na donacion/regalo y por ta 300 of 100 biyon na fiansa for di Hulanda. Pues con Bo ta regala otro placa pero Bo mesun islanan Bo ta impone condicionnan cu Bo sa di adelanta cu nos no por cumpli cu nan.
Ady Thijsen a termina bisando “Pero e ta bay un biaha mas pa pueblo compronde, e comportacion di Hulanda, den e calamidad aki”.
