Aruba Tang Soo Do Federation, hunto cu su school Gihae Tang Soo Do Ayo y Brazil, a representa nos isla cu cinco atleta na e Region 8 Fall Competition di World Tang Soo Do Association (WTSDA). E competencia a tuma luga dia 23 y 24 di october 2026 na Kalahari Resort, Pocono Manor, Pennsylvania, Merca.
E delegacion di Aruba a demostra un nivel halto di preparacion, disciplina y perseverancia, logrando un total di 8 medaya: 4 di oro, 2 di plata y 2 di brons.
E atletanan cu a bay ta:
· Emmanuel da Silva a resalta como e atleta cu mas medaya den e delegacion, conquistando dos medaya di oro den Bong (Weapon Hyungs) y Sparring, y un medaya di plata den Open Hand Hyungs.
· Aaron Marin a conquista un medaya di oro den Sparring y un medaya di brons den Open Hand Hyungs.
· Jesar Ramos a logra un medaya di plata den Sparring y un medaya di brons den Open Hand Hyungs.
· E atleta mas jong di e delegacion, Antwan Kock (8 aña), a logra un medaya di oro den Open Hand Hyungs, demostrando su talento y dedicacion na e arte marcial Tang Soo Do.
· Shantwan Kock (14 aña), atleta di faha preto (Black Belt), a representa Aruba den Division 9, categoria di 1er pa 2do Dan, demostrando compromiso, perseverancia y experiencia na nivel competitivo internacional.
Resultadonan oficial
Emanuel da Silva
Division 1 – Homber, 1er–2do Dan, 18–29 aña
· Oro – Weapon Hyungs (Bong)
· Oro – Sparring
· Plata – Open Hand Hyungs
Aaron Marin
Division 1 – Homber, 1er–2do Dan, 18–29 aña
· Oro – Sparring
· Brons – Open Hand Hyungs
Jesar Ramos
Division 1 – Homber, 1er–2do Dan, 18–29 aña
· Plata – Sparring
· Brons – Open Hand Hyungs
Antwan Kock
Division 38 – Homber, 8vo–7mo Gup, 8–9 aña
· Oro – Open Hand Hyungs
Shantwan Kock
Division 9 – Homber, 1er–2do Dan, 14 aña
Participacion internacional – Black Belt Division
Delegacion di Aruba
E delegacion Arubano tabata acompaña y sosteni pa:
· Master Melissa Noguera – Head Coach y instructor di Gihae Tang Soo Do Aruba.
· Gabriëlla Kock-Helder – Miembro di delegacion.
· Morwenna Minguel-Meijer – Mental Performance Coach di e atletanan.
E acompañamento tecnico, organisacion y mental ta forma un parti importante di preparacion y participacion di atletanan na competencia internacional. Ademas di habilidad fisico y tecnico, fortalesa mental, concentracion y confianza ta factor importante den desaroyo di un atleta.
Orguyo pa nos atletanan y pa Aruba
“Nos ta hopi orguyoso di nos atletanan. Cada medaya ta e resultado di lunanan di entrenamento, disciplina y dedicacion, no solamente di e atletanan, sino tambe di nan instructornan y famianan. E resultadonan aki ta mustra cu Aruba por competi na nivel regional cu esnan miho. Mas importante ainda, cada experiencia internacional ta contribui na crecemento personal y deportivo di nos atletanan.”
— Master Melissa Noguera, Aruba Tang Soo Do Federation.
Gradicimento
Aruba Tang Soo Do Federation ta expresa su sincero gradicimento na tur mayor, instructor SBN Melissa Nkguera, coach BSBN Rodney Thomas, BSBN Aymon Kelly, Mental Coach Morwenna Minguel Meijer y persona tur cu a contribui na participacion di e delegacion Arubano.
Un gradicimento special ta bay na Stichting Sportsubsidie Aruba (SSA) y Lotto pa Deporte Aruba pa su sosten na desaroyo deportivo y participacion internacional di e atletanan.
E logro aki ta representa no solamente un exito deportivo, sino tambe un ehempel di e potencial di e hubentud y e importancia di sigui inverti den deporte, disciplina y desaroyo personal.
E federacion ta continua su compromiso pa prepara atletanan pa futuro competencia regional y internacional, representando Aruba cu honor, respet y orguyo.
Tocante Aruba Tang Soo Do Federation
Aruba Tang Soo Do Federation ta promove e arte marcial coreano Tang Soo Do na Aruba, den marco di World Tang Soo Do Association (WTSDA). Via Gihae Tang Soo Do Ayo y Gihae Tang Soo Do Brazil e federacion ta ofrece entrenamento na atleta di diferente edad, cu enfasis riba disciplina, respet, perseverancia, liderazgo y desaroyo personal.
