Lider di oposicion Venezolano María Corina Machado a anuncia su regreso na Venezuela awe diadomingo 25 di october 2026, despues di a pasa casi dies luna den exterior. El a confirma su regreso via di un post riba e plataforma di e medionan social, skirbiendo, “Mi ta aki. Cu boso”, den un mensahe pa su siguidonan.
E regreso di Machado tambe a keda confirma p’e ex candidato presidencial di oposicion Edmundo González Urrutia, kende a celebra e noticia riba su cuenta di e medionan social y a enfatisa e importancia di su presencia bek na Venezuela.
“Mi ta hopi entusiasma pa anuncia cu nos lider, mi stima María Corina, ta bek na Venezuela”, González a bisa, kende tambe a expresa su intencion pa regresa pronto pa topa cu ne y sigui participa den e proceso politico di e pais.
Machado a bandona Venezuela na december 2025 pa biaha pa Noruega, caminda el a ricibi e Premio Nobel di Paz. Desde e tempo ey, el a realisa gran parti di su actividad politico for di exterior, principalmente na Merca y Panama.
Durante su ausencia, e lider a mantene su envolvimento den politica Venezolano y a reitera su intencion di bolbe pa apoya directamente su siguidonan y participa den decisionnan relaciona cu futuro di e pais.
Di acuerdo cu e informenan publica p’e medionan internacional, su regreso a bini despues di varios intento fracasa pa regresa den e lunanan anterior. Su team a informa e dificultadnan pa completa e biahe via varios ruta, aunke e circunstancianan exacto di su yegada no ta detaya publicamente na momento di e anuncio.
E regreso di Machado ta bini den un contexto politico marca p’e discusionnan tocante e futuro institucional di Venezuela y e posibilidadnan di organisa e procesonan electoral nobo. E lider di oposicion a defende e necesidad pa move den direccion di un transicion democratico y pa establece e condicionnan cu ta permiti eleccion cu garantia.
Machado ta prohibi di participa n’e eleccionnan presidencial di juli 2024 y e tempo ey a sostene e candidatura di Edmundo González Urrutia. E eleccionnan ey tabata rondona pa controvercia y e acusacionnan di iregularidadnan di parti di oposicion.
N’e momentonan aki, no a saca tur e detayenan tocante e regreso di Machado, ni tampoco a specifica su agenda inmediato dentro di Venezuela. Su presencia bek den e pais por marca un etapa nobo den e actividad di oposicion, ya cu e ta busca pa recobra tereno politico y participa directamente den e discusionnan tocante e futuro di e nacion.
E noticia a genera atencion tanto paden como pafo di Venezuela, mientras e simpatisantenan y e representantenan di oposicion ta spera noticia di e siguiente pasonan di e lider.
