Persona herida riba caminda di santo na Sabanilla Abou na momento cu el a perde control den un birada y bay dal den un auto di direccion contrario.
Diahuebs mainta (den careda di 10:30AM) polis a presenta na Sabanilla Abou den caminda di santo pa un persona herida. Na sitio por a compronde cu tabata trata di un ciclista cu no a midi su velocidad, a topa cara cara un trafico contrario y a spanta. A haci un maniobra pero lamentabelmente a perde control di su bicicleta.
Di otro banda e chauffeur di e auto ( Hyundai Accent blau) a haci tur lo posibel pa evita e impacto y a opta pa desvia na su man robes. No a logra. Segun e chauffeur ta conta, e ciclista lo tabata biniendo cu un velocidad basta halto y den e birada a topa cu e auto di otro direccion.
Por a evita un impacto frontal pero no e golpi den su totalidad. E bicicleta a purba haci un maniobra pa evita impacto pero a dal den un buraco y a slip cay. E bicicleta tambe a cay riba dje mientras el a bay dal den e auto parti drechi dilanti.
Polis cu a presenta na sitio a asisti e victima cu un tiki awa cu e tabata tin den patruya pa asina kita santo for di nek y curpa di e victima. Tambe a solicita presencia di ambulance pa atende cu e ciclista cu tabata levemente herida pero cu basta dolor na curpa.
Por a compronde tambe cu un familiar lo a presenta cu pickup y asina transporta e bicicleta.
