Sushi ta su pasion y su bida ta ronda di dje. Hasta su partner ta un sushi sous-chef: cera conoci cu Anyi Yulieth Fernandez di Dragonfly. Naci na Pereira, Colombia, e chef di 35 aña a bin bica na Aruba algun aña pasa, en busca di retonan culinario. Mirando cu algun di su miembronan di famia ya caba ta biba aki, el a sinti su mes na cas di biaha. Tempo cu el a haya trabao den cushina di un di e restaurantnan di sushi riba e isla, e tabata sa cu el a haya su vocacion y a bira un fanatico den crea sushi rollnan perfecto.
“Algun hende tin e idea cu sushi ta solamente come pisca curu, pero awendia e trend ta mas temprura y sushi hasa,” el a bisa nos. Na Dragonfly e ta dirigi cinco colega: dos na e sushi station, un na e tempura station, un na e wok station y un colega kende ta specialisa den dessert y salada. Su faboritonan personal ta inclui e salmon sushi y e eel temptura. E diversidad den traha sushi ta pa mantene intriga y fascina.
Anyi a cuminsa cu Dragonfly dos aña pasa; e restaurant den Arawak Garden a habri su portanan dia 24 di Februari 2017. Su cushina Asiatico ta hayando bon review y specialnan di Dragonfly ta un hit cu tanto bishitante como localnan. Dragonfly ta un adicion maraviyoso na e mescla di restaurant den e Garden, caminda cu e ta repleto cu luganan specialisa den tapas, carni, pisca y pizza. Tin musica en bibo tur anochi y hasta un sing-along piano bar net na e skina.
