Un rato pasa Corte di Prome Instancia a condena Dylan Guerrero, naci na Ecuador, acusa di a causa un accidente fatal na final di november aña pasa, na un castigo di prizon cu practicamente lo lag’e liber mesora of un djis. Fiscal no a logra convence hues pa un condena halto pa e acusado hoben aki, cu a baha caminda dal un peaton mata canando riba Linear Park.
E tabatin tres acusacion contra dje di cual e prome tabata di core iresponsabel, of core di tal forma cu e ta responsabel di e accidente fatal; na di dos luga a acus’e di a bandona e sitio despues di e accidente y na di tres luga a acus’e di stuur un auto sin rijbewijs. E tratamento a tuma luga den presencia di tanto famia di e victima Ana Rosa Montaño Martínez como di e acusado.
Despues di e tratamento, fiscal a pidi un castigo di 4 aña di cual 6 luna ta condicional y tres aña di prueba. Tambe a exigi cu durante cinco aña e no por stuur un auto.
Sinembargo, hues no a bay di acuerdo cu Ministerio Publico y a haya cu nan tabata mucho pisa den nan demanda of cu no por a substancia e demanda of convence e magistrado. A baha e castigo di cuater aña na apenas 12 luna, kitando 1/3 parti, ta pone cu e tin cu sinta ocho luna. Contando cu el a cay cera na november 2022, ta net e tempo awo pa e sali liber. A pidi pa cinco aña e no stuur, paro a bah’e na dos aña. Hues no ta haya cu por a prueba cu e tabata burachi, pasobra el a hit and run y ora a entrega su mes no a logra haya alcohol mas den cu curpa. A coy e auto envolvi den e beslag. Corte a rechasa e demanda di daño y perhuicio di famia y a referi nan pa cuminsa un caso civil den corte. Partidonan tin dos siman pa apela, si nan no ta di acuerdo cu e sentencia.
Den TREMPAN di mañan por lesa e relato completo.
