Chauffeur burachi a ricibi sla despues di ocasiona accidente

Diabierna den oranan laat di anochi un homber burachi manehando un Hyundai Accent V-Car a accidenta contra di un Nissan Ignis na altura di Nagico Insurence riba Avenida Milio Croes. E Ignis tabata para riba caminda cu intencion pa lora bay na su man robes, pues rumbo pa stadion, ey ta ora un homber burachi a bin tur cu tin y dal den nan. E yiu sinta na banda den e Ignis a sali masha rabia mes despues di e impacto y a agredi e chauffeur di e Accent. Polis a wordo solicita pa bin cu maximo urgencia pa motibo cu e situacion a cuminsa bay for di man. Na yegada di prome unidad a detene ambos persona, pues e chauffeur burachi y e yiu cu a agredi e chauffeur. E señora mes cu tabata maneha e Ignis a keda levemente herida y a wordo transporta pa hospital pa ricibi atencion medico avansa.