Diamars dia 13 di februari pa 7:00 di anochi lo tin un charla na Universidad di Aruba (Room A) tocante e relacion entre cambio di clima, cultura y sociedad. E charla aki ta organisa pa e proyecto di investigacion ‘Isleñonan na Timon’ (Island(er)s at the Helm).
Dr. Francio Guadeloupe lo duna un introduccion tocante e importancia y balor pa studia efectonan di cambio di clima y con hende y sociedad ta experencia esaki. En general ta mira y discuti e topico di cambio di clima den termino di solucion hudicial, economico y tecnico. Durante e introduccion aki lo tira un bista ariba e problematica di cambio di clima for di e perspectiva di herencia cultural y cultura popular.
Harold Kelly, arkeologo di Museo Arqueologico Nacional Aruba (MANA) y candidato doctorado arkeologia (Ph.D) lo duna un charla tocante su investigacion. E lo duna un splicacion di e resultadonan preliminario di su investigacion tocante conocemento tradicional y indigeno, e transmision di e conocemento aki den sociedad di awendia. E evento lo ta na Ingles.
Pa sign up por uza e link aki: https://lnkd.in/ekjmNEC7.
Cambio di clima ta un problematica cu ta afecta henter mundo, incluyendo e area di Caribe. Tin indicacion cientifico cu e bida diario di isleñonan lo mira cambionan drastico na aña 2050 caba, por ehempel cambionan na e costa di nos isla. Pa motibo di e indicacion nan aki a dicidi di investiga e forma cu habitantenan di e islanan ABCSSS ta adapta na cambio di clima y inventarisa ki tipo di adaptacion ainda ta necesario.
Island(er)s at the Helm ta un proyecto di investigacion di cinco aña cu a cuminsa na 2021. E ta wordo financia pa NWO (Nederlandse Organisatie voor Wetenschappelijk Onderzoek) y ta wordo organisa pa Koninklijk Instituut voor Taal, Land en Volkenkunde (KITLV). Tur seis isla Caribense den Reino Hulandes ta forma parti di e proyecto aki. Pa esnan cu ta interesa pa haya sa mas tocante e proyecto di investigacion por sigui e pagina ‘Islanders at the Helm’ riba Facebook, LinkedIn of riba e website.
