Centro di Bario Playa Pabou diaranson awo ta tur dorna na cosnan di mucha pa celebra Dia di Mucha y Dia International di Derechonan di Mucha. E ta un fecha cu tur aña e directiva di Centro di Bario Playa Pabou ta percura cu tin algo pa esnan chikito di bario.
Presidente di e organisacion, Dennis Burke, a splica cu pa di 20 aña consecutivo CBPP ta organisa un dia special pa e muchanan.
E aña’ki tin un actividad basta varios cu weganan manera di water slide, Dino Jump, combina cu diferente wega cu ta organisando. Mirando e temporada aki, ta bay tin presencia di Sinterklaas y su ayudantenan, y e evento grandi di e anochi aki ta presentacion di e artista Arubiano di taya internacional Jeon. Tambe tin brassband pa entretene un y tur presente.
E evento ta tuma luga for di 3’or di atardi te cu 8’or di anochi. E ta dirigi riba muchanan, manera Nacionnan Uni ta bisa, bou di 18 aña. Ta pidi mayornan pa laga e muchanan bini cu paña pa bañ y paña pa cambia.
Directiva di CBPP ta haci un apelacion na mayornan pa bini e atardi / anochi aki cu nan yiunan y celebra e fecha special.
