Aruba ta un isla yena di tradicionnan cu a pasa di un generacion pa otro. Un di e tradicionnan aki ta e celebracion di Dera Gay, yama tambe Dia di San Juan.
Varios ta e centronan di bario y clubnan cu lo celebra e dia aki den grandi. Manera ta custumber Centro di Bario Playa Pabou tambe lo celebra esaki. Dennis Burke, Presidente di Playa Pabou a bisa cu e dia aki lo cuminsa pa 7:00pm te cu 12:00am.
Nan lo tin un programa super atractivo, unda cu e muchanan di Anglo Kleuterschool, cu tin basta aña sin presenta na Centro di Playa Pabou, e aña aki t’ey bek. Tambe lo tin un grupo di baile bou direccion di Lia Lopez, cu lo duna un baile di Dera Gay. Tambe lo t’ey Dazzling Dancers, un grupo hubenil cu lo duna un presentacion tambe. Grupo Cultural Santa Cruz tambe lo duna nan presentacion.
Pa loke ta e bandanan, lo t’ey e grupo tipico di Aiky como tambe Rincon Boyz pa deleita e publico presente cu nan musica. Entrada pa e anochi aki ta completamente gratis. Bar y cushina lo ta bon surti.
E preparacionnan pa e fiesta di Dera Gay tabata duro, ya cu mester a busca e gruponan di baile y tambe e bandanan, pero nan ta contetno cu nan a logra y cu por celebra e dia aki den bario.
Dennis Burke a extende un invitacion na e bario di Playa Pabou y Aruba en general pa bin celebra Dia di San Juan na Centro di Bario Playa Pabou. Bin presencia e fiesta di Dera Gay, unda cu lo tin musica y mas musica.
Aruba, bin pasa un rato ameno na Centro di Bario Playa Pabou, festeha e Dia di San Juan, Dera Gay.
Cultura ta nos y cultura bo tin cu bib’e!
