Diaranson a tuma luga apertura di Proyecto Guia di Tarea di Scol (Huiswerkbegeleiding) di Centro di bario Playa Pabou.
Presidente di Centro di Bario Playa Pabou , Dennis Burke a indica cu esaki no ta un proyecto nobo den nan centro. Pa mas di 20 aña tabata tin guia di tarea di scol na Centro. E tempo aya e tabata bou di coordinacion di juffrouw Nadine.
Pero e biaha aki, ta otro. Centro di Bario Playa Pabou tin henter e organisacion bou di su encargo. Burke a sigui bisa cu e no tabata un proyecto facil, ya cu mester a convence e maestronan pa yuda den e proyecto aki. Durante prome dia ya caba nan meta tabata pa duna guia di tarea di scol na centro pa e muchanan cu no por paga pa uno cu ta mas caro. Otro meta ta pa na final di aña, pa tur mucha bay over.
Burke a gradici e mayornan pa e iniciativa pa laga nan yiunan participa den e proyecto aki, y no warda te ora nan haya nan prome rapport. A haci enfasis pa no laga e muchanan keda sin bin guia di tarea di scol, pasobra cu nan no tin les. Na centro mes, e docentenan lo dun’e un tarea pa haci.
Mas aleu, Burke a bisa cu despues cu Covid-19 a haci su entrada, interes pa trece mucha pa guia di tarea di scol, a baha, door di esaki juffrouw Nadine no por a sigui.
Directiva di Centro di Bario Playa Pabou a sigui bisa cu nan entrega un proyecto na CEDE Aruba y nan a aproba esaki sin ningun cambio.
Por ultimo, a gradici e ekipo di Centro di Bario Playa Pabou y a deseanan tur exito y pasenshi cu e muchanan. Na fin di aña lo bisa cu tur mucha di nan proyecto, a bay over.
Facilidad cu e muchanan tin na Centro di Bario Playa Pabou ta cu nan ta bay ta menos mucha den lokaal, unda cu nan por haya mas atencion pa nan problemanan y poco poco bay dilanti den nan lesnan di scol.
Meneer Candijs a bisa cu hopi biaha e muchanan di bario no tin mucho oportunidad pa siña. A enfatisa pa e mayornan por controla e tareanan di scol di nan yiunan, ya cu e docentenan por controla tres biaha pa siman, pero e otro dosnan ta e mayornan mes mester hacie.
CEDE ARUBA
Brian Krozendijk, di CEDE Aruba, nan ta sumamente contento cu e proyecto piloto aki. pa CEDE Aruba e ta unproyecto piloto ya cu bario di Playa Pabou ta un bario unda nan ta activo.
Centro di Bario Playa Pabou ta e prome cu a acerca nan pa un proyecto asina. Manera nan a hay’e, a trat’e den seno di CEDE Aruba y aproba sin ningun cambio.
Ta importante pa CEDE Aruba keda inverti den nos muchanan, cu ta nos futuro di mañan.
CEDE Aruba a desea e docentenan, directiva di Centro di Bario Playa Pabou y tambe e muchanan cu lo sa di beneficia di esaki.
Por utlimo, Brian Krozendijk di CEDE Aruba a corta cinta y asina tambe duna apertura oficial na e proyecto di Guia di Tarea di Scol na Centro di Bario Playa Pabou.