Riba diadomingo 10 di september a tuma luga e Ban Caya 2023 organisa pa CEDE Aruba. Elsa Krosendijk, coordinado di proyecto y evento a conta cu ta mira bek riba un evento sumamente exitoso. A cera caya y un total di cincuenta organisacion a arma nan tent cla pa brinda informacion. Ta trata di organisacionnan social, educativo y deportivo caminda cu hasta tabatin demostracion. E tabata un atardi familiar, caminda cu famia a bini hunto y disfruta di tur e actividadnan.
E actividadnan tabata varios, pensa riba bicicleta, Hotwheels, skateboarding, ImSan, Rode Kruis, Bus di Salud, Brandweer, Santa Rosa y mucho mas. Caya Frans Figaroa, e plaza dilanti e compleho y full rond tabata yena cu actividad. Tabatin seccionnan di pintamento di cara, dino jump, kids corner y mucho mas. Tabatin un grupo di boluntario riba bais cu tabata core riba e ruta pa sigura cu tur cos ta cana bon.
Na parti final a inaugura e WAW Mobil, kende lo tin como meta pa pasa den tur bario na Aruba y tene actividad deportivo cu e muchanan di bario. Esaki ta den cooperacion cu e Centro di Barionan rond di nos isla. E WAW mobil ta di e proyecto di Bario Unico hunto cu FCCA y IBiSA. Cada centr’i bario tin un coordinado di actividad. Na luna di maart a haci un scan na Aruba basa riba movecion y actividad pa mucha riba nos isla. E resultado tabata negativo y como solucion, un van cu ta pasa den bario y tene actividadnan cu e muchanan. Krosendijk ta gradici tur cu a yuda y haci e actividad aki posibel.
