Awe mainta Corte a trata e caso penal contra e hobennan envolvi den e tiramento den Rancho dia 18 di augustus 2018, unda cu un bala a alcansa e conocido Ski, cu a fayece dos dia despues. E acusadonan ta Ronaldo Nortan di cual su caso ta posponi wardando rapport psicologico; Joseph Boekhoudt a pidi castigo di 4 aña cera den “Jeugddetentie”; Sypress Kock a pidi 1 aña interna den un “gesloten inrichting”; Zachary Quandt a pidi 18 aña di prizon; Thomas Werleman a pidi 1 aña di prizon y Jorcy Werleman, pa kende tambe a pidi un castigo di prizon di 18 aña largo!
E cinco acusadonan den e caso aki ta: Ronaldo Nortan (18 aña), su caso a wordo posponi pa rapport psicologico y psikiatrico; Joseph Boekhoudt (17 aña) menor di edad ora di e delito y kende tabata doño di e auto y esun cu tabatin e arma den su poder; Sypress Kock (16 aña), kende tabatin 15 aña ora e hecho a tuma luga. E ta byside di Joseph y riba su auto un gang di Madiki a tira e anochi di e sucedido pa cual probablemente Joseph a sali di cas cu arma di candela cu tres bala den dje; Zachary Quandt (20 aña) mama di un yiu di 4 aña, kende no ta corda mucho kico a pasa e anochi ey pasobra el a bebe hopi na un club na Paradera y a bebe algun pildo cu a haci’e “high”. E no sa mes pakico el a tira; Thomas Werleman (21 aña), e persona kende a sconde e arma den mondi despues di e sucedido; Jorcy Werleman (23 aña) sinta dilanti den e auto, ta bisa di no sa con e cos a sosode te ora cu el a scucha e tiro. Pero tin declaracion cu ta bisa Quandt dado momento a puntra “tira of no tira” y e tabata e unico cu no a contesta.
Dia di e asesinato
E grupo tabata riba un trip e anochi ey unda cu Joseph y Sypress a bay busca e otronan. Pakico a sali cu arma, niun no por a duna un contesta convincente y Sypress ta bisa cu no sa mes cu Joseph tabatin un arma di candela y nunca el a wak’e, y mesun cos ta wordo bisa door di Jorchy. E ta bisa cu den e auto Joseph a mustra nan un tas den cual e tin un arma, pero e no a mira e arma mes.
Despues di a bebe y uza droga, e grupo a coy direccion di Rancho, unda nan a pasa dos biaha prome cu dado momento Joseph a para e auto y a pasa Zachary e arma. E acusado aki a puntra su amigonan “tira of no tira” y el a scucha nan grit’e “tira, tira, tira”. Asina el a baha bentana y a los tiro direccion di un algun persona di Gang di Madiki tabata para. Pero e bala alcansa e conocido Sky, kende tambe tabata para eybanda. Despues nan a huy for di e sitio y a coy direccion di San Nicolas. Polisnan no tabata sa nada di esnan responsabel te ora cu Zachary a bay entrega su mes hunto cu su tata y su Abogado.
Demanda di Fiscal
Fiscal a bisa cu en realidad, den e caso aki mester aplica e regla di “samen uit samen thuis”, pero mester tene cuenta cu na momento di e sucedido mas cu un di nan tabata menor di edad. Den e caso di Sypress, kende tabatin 15 aña ora cu di e sucedido y ainda ta menor di edad, e conseho di expertonan ta pa pone den un “gesloten inrichting” pa un aña y esaki ta loke Fiscal a pidi tambe. Den e instituto aki e lo haya e guia necesario.
Su amigo Joseph, esun cu tabata maneha e auto y cu tabatin e arma, tabatin 16 aña ora di e sucedido. Den su caso tambe a conseha pa interne den un centro cera pero e psicologo tin otro pensamento riba esaki. E ta haya cu e por sigui un tratamento y cu guia. Como cu e ta “first offender” y den jeugdstraaf e maximo di castigo ta 4 aña, Fiscal a dicidi pa pidi esaki tambe. Pues 4 aña den Jeugddetentie.
E rol di Jorgi Werleman ta mustra minimo pero asina mes Fiscal a baha pisa riba dje. Tin 2 rapport traha y Reclassering ta conseha pa e bay bou di guia y esaki ta e mesun conseho di Psicologo. Den e caso aki ta acus’e di “medeplegen moord” of intento di asesinato pa cual a pidi 18 aña. Esaki a cay manera un baño di awa friu p’e mirando cu for di november ultimo e ta den libertad.
Zachary Quandt, tambe ta un “first offender” y rapportnan a mustra cu e ta completamente consciente di su actonan, incluyendo e delito cu el a comete. A simplemente pidi un arma, habri bentana y los tres tiro riba cuater persona di cual un a alcansa Sky, kende a fayece dos dia despues riba caya. E castigo di 18 aña cu Fiscal a pidi p’e a lag’e den shock y a sak su cabes abou, mustrando cu ta algo cu e no a spera.
E ultimo acusado tabata Thomas Werleman, acusa di posesion di arma di candela. Den e caso aki tin un morto a cay den e tiramento, despues el a sconde e arma. Teniendo cuenta cu e maneho di Hof pa posesion di arma, a pidi un castigo di 1 aña di prizon p’e.
Aki tres siman Hues lo dicta sentencia.
