“Mi no tin placa ni pa cria mi yiu di 4 aña,” of “Mi ta un asielzoeker y mi no mag traha,” ta algun di e comentarionan cu por a scucha awe mainta den Corte ora cu e prome grupo di 23 sospechoso deteni pa violacion di Toque de Queda a presenta dilanti mesa berde. Mayoria di nan tabata eydilanti pa motibo di no a paga e boet di 1000 florin den dos siman di tempo. Y awo e situacion ta pio pasobra no tin trabou.
Por a scucha hopi version, algun ta bisa di no a sinta cu a haci algo malo, a pensa cu tabata cerca di cas mes y otronan a lubida completamente cu tabatin TDQ. Jose Gregorio Sint Jago ta un di nan. E ta consciente cu el a haci fout, pero “placa pa paga mi no tin señora el a bisa Hues. Y a sigui bisa “mi ta dispuesto pa haci cualkier trabou. Hasta mi por drecha e bentananan den Corte. Of mi lo por paga si juffrouw haya un trabou pami,” el a bisa Hues.
E anochi ey, 23 di maart, e tabata cerca su bisiña, kende a haci aña. Nan ta biba na un compleho di apartamento. Ora cu e fiesta a caba e tabata canando pa yega su apartamento cu ta dies meter mas leu di su amigo y nan a wordo para. “Mi no a corda riba Toque De Queda mes, te ora cu Polis a grita “sinta abou, sinta abou” y a yega como 7 polis mas.” El a agrega, cu ta e ora ey el a corda cu tabatin Toque de Queda. “Nos ta biba den un hanchi y nos ta sinta tur dia eynan, wak autonan pasa.”
Na final, el a haya un castigo di 40 ora di trabou pa comunidad. E tabatin un amigo cu ne, kende tambe tambe a presenta den Corte awe. “Mi bisiña tabatin placa pa paga di biaha. Pero ami no. Mi no por traha, pasobra mi a pidi asilo,” el a bisa. Na final el a haya un boet di 1000 florin cu e mester paga den 6 luna di tempo. Di unda e ta bay saca e placa, e no a bisa.
Den algun caso OM a pidi pa subi boet na 1200 florin, manera ta haci ora cu casonan yega Corte, pero Hues a bisa cu e no ta mira esey necesario. Den tur casonan cu a impone boet, esaki tabata 1000 florin of 20 dia cera si no paga e boet den e termino stipula. Esnan cu no tin trabou / entrada a haya 40 ora di trabou pa comunidad of 20 dia cera.
Vrijspraak
Alvin Ras a sali di bon. El a haya vrijspraak. E tabata na un cas na Ponton, sinta dilanti porta di entrada di cas hunto cu un amigo ta wak autonan pasa, principalmente e show di autonan di polis cu zwaailicht y sirena. Dado momento un auto cu number A a pasa nan y a reverse. Un homber a baha di e auto cu un arma largo den su man y el a spanta. “Mi a bisa e homber, amigo si ta placa bo kier, nos por papia, no mester uza arma.” Despues el a haya sa cu ta polis. Pero e no ta mira pakico nan a detene y e kier a presente cu un testigo pa bisa cu e no tabata riba caya, pero dilanti di porta di cas sinta.
“Mi ta tuma bo palabra cu ta berdad y no mester di testigo,” e Hues a bis’e. Na final el a dun’e vrijspraak pa motibo cu kico ta wordo compronde bou di un “woning” mester ta splica mas amplio posibel. E solo hecho cu autoridadnan mester a keda splica e situacion, ta nifica cu e hendenan no tabata compronde kico tabata nan limite. “Bo no mester paga boet,” Hues a bis’e.
Toque de Queda 2020
Gobierno a aplica e medida di Toque de Queda na Aruba despues di mas o menos 43 aña. Na tur e Toque de Queda a keda na vigor durante 67 dia y a detene 683 sospechoso. E prome dia tabata 21 di maart y e ultimo dia tabata 27 di mei 2020. E multa a cuminsa na Afl. 1.000,= y por a subi mas tambe, dependiendo cuanto biaha a detene Bo y si Bo resisti of comete otro infraccion banda di e hecho di ta riba caya despues di e orario stipula. No ta tur persona deteni a haya multa ni a keda encarcela. Pues Sub Fiscal a laga algun persona bay mesora, mientras otronan si no a core e mesun suerte y a haya nan den un debe inespera. Ta e grupo aki awo ta bringando e decision di Polis y Fiscal dilanti un Hues imparcial.
