Diasabra banda di 5:30 am a sosode un caso intencional serio. Despues cu anochi e homber Wendell Cordero a saca arma di candela na San Nicolas pa su victima, mainta sea e mes cu un amigo of a manda dos hende kima auto di e victima.
E victima ta Andres Valdez. E ta conta cu e no tin problema cu hende. Unico hende cu e tin problema cu ne ta Wendell Cordero. E anochi prome el a bay cumpra cuminda na San Nicolas. Eynan Wendell Cordero a yega para dilanti su auto.
Wendell Cordero ta conoci pa husticia y a cay cera mas cu un biaha. Andres Valdez a splica cu e tin hopi tempo sin sa di Wendell. Nan dos tin problema cu otro pa algun aña caba pasobra Wendell a drenta horta den cas di su mama. E mes, segun Valdez, no ta hinca den nada. El a cambia bida masha tempo y tin su negoshi y famia pa atende. Awo cu e situacion cu a presenta, e ta spera cu husticia haci su trabou. Si esey no sosode e mes mester regla e cos na su manera. Esey kiermen cu e mester bay bek na su bida di algun aña atras. No por laga e cos aki asina. Bo no por saca arma y menasa anochi y prome cu solo sali ta kima dos auto. Anochi ora Wendell a saca arma di candela, e victima no a yama polis. Mester bisa si cu tin testigo di loke a sosode. E mes a pasa man pa un baranca pa manda riba Wendell cu a saca e arma di candela y mik riba dje.
Diasabra mainta prome cu 6:00 el a scucha un pitamento pafo di su cas. E hendenan pasando a cuminsa bati alarma y pita pa lanta tur hende. Ora el a lanta a mira con su dos autonan ta na candela. A pasa man pa slang di awa y bati alarma na autoridad. Polis y bombero a yega na sitio. E apartamento a sufri daño y e cas unda Andres ta biba tambe tin daño. Un Kia a keda tur kima patras y no ta sirbi mas. E pickup di trabou cu Andres Valdez ta uza a keda cu e cabina completamente kima. A graba dos homber riba camara di siguridad, e homernan tabata cu mascarada. Un di nan a zorg pa e Kia y e otro a zorg pa kima e pickup.
Awo Andres Valdez a keda cu dos auto kima. Su auto pa core cu famia y su pickup di trabou. Un situacion fastioso cu mester di atencion urgente. Polis a atende e caso trempan y diasabra mainta recherche a keda di bay tambe na e adres pa mira e daño y tuma un denuncia oficial. Tur material di siguridad tambe lo bay pa autoridad.
