Cas di Machi a haci un bunita gesto. El a saca un man pa un prohimo. Sra. Christina ta encabesa Cas di Machi, cu ta brinda cuido na nos grandinan. Algun di e grandinan ta pasa nan dia y algun di nan ta keda drumi.
Siegfried Kelly,kende algun dia pasa tabata bibando den un situacion inhumano, a ricibi yudansa di Cas di Machi. Un dama a yega na Cas di Machi y a laga sa cu Kelly no tabata tin luga di biba. Di e manera aki Cas di Machi a habri su portanan. Ya ayudo social ta bay yuda cu 950 florin pa Kelly y nan mes ta cubri e diferencia.
Cas di Machi a adopta Siegfried Kelly. Ta spera cu e ta sinti bon. Dokter di cas a bin wak’e caba pa wak kico e tin y kico mas por haci p’e. Te asina leu, e ta sinti su mes tiki miho. Sra. Christina ta spera cu loke nan ta haciendo, Aruba por compronde.
Siegfried Kelly contento
Apesar cu Kelly ta contento, e no por wak rond. Sra. Christina a menciona cu Kelly tabata yora por ta pa e situacion cu el a pasa aden.
Siegfried Kelly mes, a menciona cu e tin bon trato. El a ta sinti cu e yudansa ta bon. E ta haya guia, pasobra e no por mira dje bon ey. Kelly ta sumamente satisfecho y gradicido pa e yudansa cu el a ricibi.
Nan trabao
Cas di Machi ta trata hendenan grandi cu tin algun di nan cu un ke otro problema tambe. Sra. Christina a splica cu e personal ta studia y tambe mester tin amor y pasenshi pa e trabao aki. Mester tin hopi amor, duna bon cuido. Tin grandi ta bin pasa dia for di mainta te atardi laat. Ta trece nan pasobra mayoria di famia ta bay traha y ta laga e grandinan na Cas di Machi. Nan tin actividad cu nan. Sra. Christina no kier pa nan keda sinta por nada.
Luga
Te awor aki tin un luga so pa un hende muhe. No tin luga mas.
Awor aki loke ta pendiente pa e yudansa di Departamento Social, pa asina dun’e asistencia social. Siegfried Kelly ta haya hasta cuminda extra, e ta conta. E ta den bon man awo. E ta comporta su mes tambe, pa e sigui haya bon trato.
E gesto aki ta uno special, unda cu a habri porta di Cas di Machi mesora. Awo ta djis keda pendiente pa e asistencia di ministerio di asuntonan social.
Awendia, tur cos no ta placa, sra. Christina a menciona. Nan ta dispuesto pa yuda na esun cu tin mas mester.
