Manera ta custumber, riba 11-11 (11 di november) e temporada di Carnaval ta ranca sali. E aña aki, e preparacionnan a cuminsa desde trempan, ya cu ta despues di dos aña cu no tabata tin carnaval, e temporada di 2023 un biaha mas, e pueblo lo por gosa di dje un biaha mas
Despues cu a lansa e jingle oficialmente parti mainta, anochi a sigui cu actividad mes. Contrario na tur aña caminda cu e actividad Carnavalesco ta tuma luga den Carnival Village, e aña aki SMAC a scoge pa trece e actividad aki Playa, den curason di Oranjestad. A cera Caya G.F. (Betico) Croes, pa asina brinda e publico Carnavalesco, un dushi ambiente.
Darren Van Ommeren, Presidente di SMAC, tabata hopi emociona di a wak un evento c’un publico basta grandi cu a bin disfruta di e apertura di e temporada di Carnaval. Tabata tin presentacion di D’licious, Tsunami, Buleria, DJ Kesh, Youth X-treme, Whiteboy y sin laga afo Groovemasters. Un ambiente total cu a conta cu e presencia di Empire Carnival Group, Champagne Carnival Group, Infinity Carnival Group, Don Flip cu tabata tin bendemento di cuminda. Y asina por sigui menciona.
E directiva di SMAC ta sumamente contento di por a bin cu e cambio total cu sigur a resulta di tabata uno exitoso, cu tabata un evento di recauda di fondo, pa por yuda e actividadnan cu nan lo tin den futuro y tambe cierto gruponan di mucha. E bandanan cu a coopera cu SMAC, pa cual SMAC ta sumamente gradicido.
E temporada di Carnaval 2023 ta completamente dedica na memoria di Ruben ‘Scorpio’ Garcia.
