Na november 2011 e United Nations Educational, Scientific and Cultural Organization (UNESCO) oficialmente a designa 30 di april como e Dia Internacional di Jazz pa asina resalta jazz y su rol diplomatico cu ta uni hende di tur parti di mundo.
Dia Internacional di Jazz ta presidi y dirigi pa e director general di UNESCO Audrey Azoulay y e legendario pianista y compositor di Jazz Herbie Hancock kende ta fungi como UNESCO su Goodwill Ambassador y President di e Herbie Hancock Institute of Jazz.
“Cu conflicto y division den hopi parti di mundo, e ta mi deseo cu a traves di e lenga universal di jazz, nos celebracion e aña aki por inspira hende di tur pais pa sana y pa tin speransa y pa traha hunto pa asina sostene paz”. Tabata e palabranan di Herbie Hancock, embahador di bon boluntad di UNESCO.
PAZ Y UNION MUNDIAL
Dia Internacional di Jazz ta un dia den cual ta uza jazz pa promove paz, fomenta libertad di expresion, fortalece respet mundial pa dignidad y derecho humano ademas di avansa den desaroyo di dialogo entre diferente cultura.
Den entrevista, e musico Carlos Bislip a informa cu riba dia 30 di april, na nivel mundial, ta celebra Dia Internacional di Jazz caminda Aruba ta preparando cu esaki cu e presentacion di diferente grupo.
Bislip a informa cu 30 di april ta cay riba un diadomingo y un grupo di artista tin un grupo di alumno cu yama Caribbean Combo. Tambe ta bay tin dos artista invita di Merca cu tin estudio avansa di jazz y ta bay toca cu e alumnonan.
E prome presentacion lo ta di Caribbean Combo cu ta e agrupacion di Bislip cu ta reuni tur diasabra mainta na Scol di Musica Rufo Wever. Caribbean Combo su repertorio ta enfoca riba ritmo di nos region cu ta priminti di ta un presentacion basta “spicy”. Segundo presentacion di e anochi lo ta e grupo di Eric Jan Eman and The Groove Hunters cu lo toca un repertorio funky cu enfasis riba improvisacion. Despues di “The Groove Hunters” lo ta e presentacion di e Carlos Bislip Quintet.
Carlos cu normalmente sa presenta un repertorio Tropical Jazzistico den formato di Latin Jazz Septet, e biaha aki a opta pa duna un tributo na e “Bebop Era”. E etapa di jazz aki ta caracterisa pa tema cu tempo hopi lihe, improvisacion aventurero, harmonia complica y cu un enfoke den virtuosismo individual. E formato comun di e “Bebop Era” ta piano, bass, drums, tenor sax y trompet.
E di cuater grupo lo ta Reno Steba cu su grupo Oruba cu ta conoci di ta e musica tribal di Aruba. E musica di Oruba tin su reisnan den e tradicion folklorico, nativo y di jazz di e musica Caribeño. Bislip a comenta cu e experimenta cu Steba ta haciendo cu e musica di Aruba y su vision artistico ta algo hopi unico, anto cu e ta sumamente contento di tin Steba entre e artistanan di e edicion aki di e Carlos Bislip Jazz Expo.
Pa finalisa e celebracion di Jazz Appreciation Month y International Jazz Day di 2023, Bislip a puntra Franklin Granadillo pa duna un presentacion demostrando su maestria como compositor y areglista. Granadillo lo deleita e audiencia y e siguidonan di e Carlos Bislip Jazz Expo cu un repertorio cu lo consisti di algun cancion original y di nos folklore tradicional, pero den un bachi nobo.
Bislip tambe a conta cu na 2006, ora el a bay na un conferencia internacional di educadornan di Jazz na New York, el a bin tende di e esfuerso di e Smithsonian Institute pa engrandece e impacto di Jazz na Merca anto a designa full e luna di April na Jazz cu ta yama Jazz Appretiation Month den cual nan a encurasha tur e miembronan internacional y educadornan pa cuminsa haci algo semehante na nan pais, manera con e instituto aki ta haci caba na Merca.
Ora Bislip a yega Aruba, el a cuminsa organisa e celebracion di Jazz Appretiation Month “JAM”na Aruba cu a tuma luga den e sala chikito na Cas di Cultura. Pa e siguiente 5 aña el a haci e celebracion dilanti Biblioteca Nacional Aruba (BNA)unda el a pone e hobennan toca hunto cu musico profesional. Despues di BNA e celebracion di JAM a bay varios luga manera dilanti di Cas di Cultura, Plasa Turismo, Renaissance Market Place, Alhambra Mall, Casibari, Plaza Daniel Leo y Scol di Arte.
RESERVA
Bislip a expresa cu jazz ta e idioma internacional cu ta comunica comunidadnan cu otro, pa e motibo ey UNESCO a declara e dia 30 di April como e Dia Internacional di Jazz “UNESCO a ripara cu mas cu otro musica jazz ta conecta humanidad cu otro y p’esey mi kier invita full pueblo di Aruba pa bin presencia un momento hopi unico unda bo ta wak hobennan ta toca cu profesionalnan di afo y e biaha aki e mescla di e lineup di artistanan ta bay ta hopi varia, e ta bay ta un anochi hopi unico den cual e actividad aki ta bay ta gratis y si personanan kier reserva nan luga, nan por yama na Kulture Cafe na 280 5566 pa nan por haci un reservacion.
UNESCO a decreta e dia na aña 2011, cu e obhetivo di duna di conoce un movemento musical di un balor educativo grandi, asina como e recurso valioso cu ta contribui na intercambio cultural, dialogo y cooperacion entre e pueblonan na nivel mundial.
E celebracion di e aña aki lo conta cu e talento di e musiconan di Caribbean Combo cu ta Alakina Gonzalez, Emanuel Gonzalez, Alejandro Gonzalez, Renzo Dijkhuizen, Elijah Wester, Denzil Tromp, invitado special Ana Nelson y Zoe Murphy. The Groove Hunters ta Eric Jan Eman, Kyle Winklaar, Pierre Koolman, Lazaro Barrizonte. Carlos Bislip Quintet ta Ivan Quandus, Jamaal Baptiste, invitado special Ana Nelson y Zoe Murphy. Reno Steba y Oruba ta Jeremy Bonarriba, Johnny Scharbaay, Hubert Thiel, Serghio Jansen, Jaderick Croes, Papito Rafael y Arthur Kelly. Franklin Granadillo Band ta Ana Nelson, Zoe Murphy, Ivan Quandus, Jamaal Baptiste, Chris Rodulfo, Denzil Tromp y Carlos Bislip.
E celebracion aki no ta posibel sin e sosten di e patrocinadonan cu ta, entre otro, Walking Turtle Entertainment, M.A. (Michael Alexander), La Cabana, UNOCA, Kulture Café, A.A.A. Aruba Ports Authority, SETAR, PBCCG (Prins Bernhard Cultuurfonds Caribisch Gebied), Vibration PR, Departamento di Cultura Aruba, Garage Central Aruba, Amterdam Manor, Tropical Bottling Company y Pepia Est N.V.
Carlos Bislip kier invita tur e siguidonan di Jazz pa no perde e oportunidad aki pa bin na Kulture Cafe na San Nicolas riba 30 di april for di 7or te cu 10.30 di anochi.
