Den un resolucion adopta dia 7 di april, 2011, Asamblea General di Nacionnan Uni a designa april 12 como Dia Internacional di Vuelonan Espacial Tripula.
Exploracion espacial ta provee conocemento clave di e historia di nos sistema solar. Sin exploracion espacial lo nos no tin satelite den orbita. Satelite ta asisti nos cu comunicacion global, siguridad y nabegacion aereo, terestre y maritimo. Sin satelite lo no tabatin GPS.
Satelite por yuda meteorologonan pronostica tempo. Ademas satelite y tecnologia satelital ta hunga un papel crucial den actividad di observacion di Tera for di espacio, cual por yuda pa monitor, compronde y adverti nos riba potencial desaster natural, contaminacion di ocean, factor cu ta contribui na cambio climatico y salud di ocean y su ecosistemanan, vigila area grandi marino proteha, monitor di pesca ilegal y traficacion ilegal di droga, asisti cu investigacion cientifico di biologia marino y na final tambe ta esencial pa agricultura, por ehempel den monitor awa dushi.
E United Nations Office for Outer Space Affairs (UNOOSA) ta e organo di Nacionnan Uni responsabel pa cooperacion internacional den uzo pacifico di espacio ultratrerrestre.
DIA MUNDIAL DI CREATIVIDAD Y INNOVACION-APRIL 21
Dia Mundial di Creatividad y Innovacion ta conmemora riba april 21 y ta enfoca riba e papel cu industria cultural y creativo ta hunga den nos economia local y global y alabes den e procesonan pa soluciona problema cu nos ta encontra pa yega na un desaroyo sostenibel.
No tin un interpretacion universal di e concepto di creatividad. E concepto por ta comprendi di cubri e spectrum di expresion artistico te cu soluciona problema (problem-solving) den e contexto di desaroyo economico, social y desaroyo sostenibel.
P’esey Nacionnan Uni a designa april 21 como Dia Mundial di Creatividad y Innovavion pa eleva e concientisacion p’e papel cu creatividad y innovacion ta hunga den tur aspecto di desaroyo humano.
TECNOLOGIA ESPACIAL, CREATIVIDAD Y INNOVACION PA LOGRA E OBHETIVONAN DI DESAROYO SOSTENIBEL
E edicion No. 6, 2020 di ITUNews Magazine di International Telecommunication Union ta dedica n’e tema “Space Science for Achieving the Sustainable Development Goals” y ta enfoca riba e importancia di observacion di tera for di espacio, monitor di atmosfera, ocean y clima.
Pero e importancia di tecnologia espacial ta hopi mas amplio y p’esey den e Resolucion A/76/L3 adopta pa Asamblea General di Nacionan Uni, 25 october 2021 a crea e Space2030 agenda como instrumento di impulso pa logra e Obhetivonan di Desaroyo Sostenibel (SDGs).
Den e rapport di UNCTAD titula Exploring Space Technologies for Sustainable Development di 2021 ta destaca seis area principal (1) alimento y agricultura, (2) aplicacion den cuido medico y salud, (3) acceso na telecomunicacion y internet, (4) reduccion di riesgo di desaster y asistencia humanitario, (5) maneho di recurso natural y medio ambiente y (6) reduccion di pobresa.
Den e capitulo dedica na avancenan tecnologico recien ta identifica (1) inteligencia artificial y cloud computing, (2) plataformanan emergente di tecnologia satelital y aereo y (3) crowdsourcing.
Tambe ta señala e falta di conocimento di e beneficionan di tecnologia espacial y scarsedad di recurso humano y financiero pa utiliza esakinan.
Den un presentacion di Danielle Wood di MIT Media Lab y directora di e Space Enabled Research Group di MIT ta identifca seis technologia espacial cu actualmente ta sostene e SDGs: (1) satelllite earth observation, (2) satellite positioning and navigation, (3) human space flight and micro-gravity research, (4) satellite communication, (5) space technology transfer y (6) inspiration from research and education.
E SDG cu mas ta beneficia di tecnologia espacial ta SDG 9, Industria, Innovacion y Infrastructura.
Den e publicacion di UNOOSA y e European Global Navigation Satellite System and Copernicus, Supporting the Sustainable Development Goals: Building Blocks towards the 2030 Agenda ta duna un resumen detaya pa cada un di e 17 SDGs con por aplica tecnologia espacial.
UNOOSA pa facilita acceso na tecnologia espacial pa tur pais por uza esaki den logra e SDGs a crea e programa Space4SDGs.
Pa Aruba e sector cu mas lo beneficia di tecnologia espacial pa cumpli cu SDG 9 Industria, Innovacion y Infrastructura ta e asina yama creative industries, identifica tambe pa Gobierno di Aruba den su rapport Six Promising Sectors.
Kico exactamente nos por interpreta como creative industries? E literatura cientifico ta haci un distincion entre cultural and creative industries (CCIs) y creative industries (Cis) cual ultimo ta ser considera un impulsor (“driver”) pa desaroyo y crecemento economico.
Creative industries tin 13 sector, especificamente: (1) advertising y mercadeo, (2) arkitectura, (3) e mercado di arte y antiguedad, (4) artesania, (5) diseño, (6) designer fashion, (7) industria cinematografico y video, (8) software interactivo pa recreo, (9) musica, (10) artes bellas (literatura, arte escenico, arte visual), (11) publicacion imprenta y digital, (12) software y computer games, (13) streaming media, television y radio.
Den e contexto di SDG 9 Industria, Innovacion y Infrastructura creative industries na Aruba ta ser defini p’e sectornan (1) advertising y mercadeo, (2) diseño, (3) industria cinematografico y video, (4) software interactivo pa recreo, (5) musica, (6) publicacion imprenta y digital, (7) software y computer games, (8) streaming media, television y radio.
E conclusion ta cu creative industries na Aruba ta esunnan mas indica pa probecha di technologia espacial.
Aruba como pais cu un grado halto di digitalisacion, utilisacion di Internet y servicio online y un infrastructura di telecomunicacion avansa por beneficia di utilisacion di tecnologia espacial pa desaroya su creative industries y amplia su base economico y hasta innova nos turismo den e proceso pa loke ta e forma di experiencia nos isla, cultura y entretenimento ofreci den forma fisico y virtual.
Trintitres aña pasa a funda Stichting Internationale Teleport Aruba (International Teleport Aruba Foundation) cu e meta pa studia con telecomunicacion avansa y infrastructura digital por contribui na crea sector industrial high tech nobo na Aruba, particularmente uzando tecnologia satelital.
Pronto nos lo publica con tecnologia espacial, Space2030 y Space4SDGs por yuda Aruba logra cumpli cu e SDGs y desaroya y innova nos creative industries.
