Companianan di utilidad ta trata di crea un sistema pa pago di recibonan cu ta vence, sinembargo asina mes ta surgi problema.
Na WEB por ehempel awe mainta a surgi un caos, unda clientenan bou di otro a cuminsa discuti entre nan mes.
Den e propaganda cu WEB a pone riba Facebook, a menciona cu ta cuminsa atende personanan 60+ di 8’or pa 10’or di mainta y despues ta atende resto di clientenan. Pero eybou tabatin movecionnan cu no a cay na agrado di esnan presente. Por ehempel, cada bes cu e fila move, e personanan ta move pa sinta riba otro stoel, cu ta trece un riesgo grandi tambe.
Pero banda di esaki, tabatin hendenan menor di 60 aña cu a yega prome, pa ora nan turno cuminsa pa 10’or di mainta, nan paga nan cuenta lihe. Pero no a tene cuenta cu esaki. Asina por ehempel, ora cu 10’or a bati, a cuminsa atende esnan bou di 60 aña, pero ta resulta cu e hendenan grandi ta sigui yega y cada biaha mester pone esnan bou di 60 bek pafo pa sigui warda. Asina a surgi confusion cu no sa mas kende tabata tempran of laat na e sitio.
Y e situacion por a mira awe un biaha mas na oficinanan di ELMAR, filanan largo, na Arugus, na Setar y tambe na supermercadonan.
Tur esaki ta un situacion den cual mester bini un cambio. Na paisnan manera Colombia, Latino America y na otro continentenan, personanan di 60 aña of mas ta prohibi pa subi caya. Ta busca otro forma pa cumpli cu nan respondinan cu nan mester haci.