Un rato pasa a sosode un accidente den bisindario di ex-Wan Boy Supermarket na Tanki Leendert. Tabatin un persona herida den e desgracia aki, cu a sosode algo prome cu 7:00 pm, den dilanti di Chalo Burger.
Na momento cu polis a yega na e sitio, a constata cu e auto marca Audi, a pega na candela. A logra saca e chauffeur femenino na tempo for di e vehiculo. Por a nota cu el a sufri basta sla, ya cu e tabatin sanger na su cara. Tabata trata aki di e cantante Dhaddy Brokke di e banda Dedhalavie Combo di añanan 70 y despues conoci den e duo Dhaddy cu Tony. Brokke ta na Aruba pa motibo di enfermedad di un famia, pa colmo hay’e envolvi den un accidente tambe.
Como cu ambulance no a yega e momento ey ainda, a pone e victima sinta den e vehiculo policial. A cera e caminda pa permiti polis y bombero haci nan trabou sin estorbo di trafico. E auto Audi cu a cuminsa saca huma, despues a pega candela por completo. Por a scucha inclusive explosion. Probablemente e causa di e candela tin di haber cu e bateria.
Polis a cuminsa cu un investigacion mesora na e sitio pa por determina e causa di e accidente aki. Ambulance finalmente a transporta e cantante local, pero cu ta di bishita riba su isla, pa ricibi tratamento medico avansa na Dr. Horacio E. Oduber Hospital. Lamentablemente Brokke mes a caba di sali di un tratamento largo cu su mesun salud na Hulanda. El a bin busca drechi di un ruman malo na Aruba y awo e mes a hay’e den un accidente. Nos ta desea Dhaddy Brokke pronto recuperacion.
