Segun dokter Latour, 10 hende muhe ta wordo diagnostica cu un forma di cancer na matris aki na Aruba pa aña. Ta hende muhenan di tur edad y por mira cu mayoria di e hende muhenan ta entre 25 y 45 aña.
Hende muhenan cu tin famia, cu ta traha. Cancer na Matris ta wordo causa door di un virus, esta e HPV. E virus aki por wordo haya door di contacto sexual. E virus aki no ta wordo proteha door di uzo di condom. Tin cu asumi cu esnan cu ta sexualmente activo, tardi of tempran ta bin topa cu e virus aki. Mescos cu tur otro virus, manera Influenza, ta caba na nada. Solamente cerca algun hende muhe, e virus aki ta keda presente cronicamente activo. Un infeccion cronico finalmente por causa anomalia na e boca di matris. E anomalianan aki por bira cancer na boca di matris.
Cancer na boca di matris no ta causa keho. Hopi biaha durante di su fasenan e no ta causa keho y tampoco ta causa di sanger. Hende muhenan cu ta wordo diagnostica cu cancer na matris, hopi biaha ta den un fase avansa. E tratamento di cancer na matris, ta consisti di un tratamento pisa cu no por tuma luga na Aruba. Hende muhenan ta wordo manda den exterior. Posiblemente na Colombia, pero tambe na Hulanda y hopi biaha tin cu keda pa lunanan largo. E tratamento ta extremadamente pisa. Ta trata di un combinacion di bestraling y chemoterapia. Afortunadamente, cancer na matris, den su fase avansa, por wordo trata. Pero e tratamento ta asina pisa, cu e hende muhenan ta sinti molester di dje pa bida largo. Nan no por haya mas yiu y hopi biaha ta keda malo. E malesa aki ta keda cu un impacto riba bida di e hende muhe.
Kico por haci pa prevenie
Cancer na boca di matris, den un fase tempran, un voorstadium, tambe por wordo diagnostica por medio di un paptest. Ta importante pa laga haci un paptest regularmente. Cu un paptest por logra diagnostica un fase tempran di cancer na boca di matris y esey por wordo trata na Aruba mes. Un voorstadium di cancer na matris, por ta hopi fastioso. Hende muhenan cu ta haya paptestnan cu no ta sali bon, mester bay continuamente na dokter di cas of ginecologo, ta sumamente fastioso.
Tambe por haci algo pa percura pa hendenan no haya e kehonan aki y cu un contagio cu HPV no wordo preveni y esey ta door di vacuna nos hobennan cu e vacuna contra HPV. Ta momento pa e mucha muhenan cu no ta activo sexualmente y nunca a yega di bin en contacto cu e virus di HPV pa nan vacuna, e ora nan tin un chens cu nunca nan lo haya molester di tur e problemanan aki.
