Update: Caso horibel na Corsou Venezolano dera bibo

10642

Autoridadnan na Corsou ta investigando, kende ta responsabel pa un homber dera bibo, segun a sali na cla awo. Tin persona deteni te na e momentonan aki.

Segun un publicacion di e matutino EXTRA di Corsou, e victima ta e homber Venezolano Angel Alexander Barrios Rodriguez di 50 aña di edad.
Ta parce cu su amistadnan a bati alarma cu el a disparce riba un diabierna den luna di februari ultimo. Y awo a bin descubri cu e ta mata. A saca afo cu a der’e den un buraco na momento cu e tabata na bida ainda, segun e matutino a publica.

E persona deteni ta un empleado di e victima, esta un hoben Venezolano di apenas 20 aña, kende ta deteni for di dia 6 di maart ultimo. For di e tempo ey nan a bin ta interogand’e pisa. E ta desmenti di a comete e delito cruel aki pero si a admiti na final di sa unda e curpa di su hefe di trabou ta. Dia 18 di maart el a indica na autoridadnan e sitio unda e curpa ta hinca den un buraco, na un area cu yama Choloma. Segun EXTRA a publica, a haya e victima dera di un forma hopi cruel. Mirando e tempo cu a transcuri, e curpa no tabata intacto mas. Su mannan tabata mara. E sospechoso a bisa cu nan a secuestr’e y a obligue di saca placa for di cuenta di e victima.

Algo den estilo di atraco cu a finalisa den asesinato. E hoben empleado Venezolano tabata esun encarga pa deposita placa di negoshi, manera e homber di confiansa di e victima y tabata sa su asuntonan bancario bon. Y Polisnan a detene pasobra a constata cu e tabata e ultimo persona a purba lanta placa di e cuenta. Ora cu a confronta e hoben cu e situacion aki, el a nenga di tabata esun cu a mata su patron, y tampoco tabata responsabel pa su desaparicion. Pero cu e tambe tabata victima di esnan responsabel, kendenan a secuestr’e. Con e storia di e secuestro aki ta hinca den otro no ta conoci. E hecho aki a tuma luga den un area conoci como Choloma