Den fin di siman a tuma luga e final pa e campeonato di volleybal, den cual un cantidad di atleta y fanatico tabata presente pa aporta y engrandece e deporte. Mena Curiel, presidente di Aruba Volleyball Association, a conta cu e campeonato nacional a cuminsa for di luna di december 2023 caba y awo ta caba e luna ‘ki. A inicia e campeonato cu hopi atleta bou di 15 aña, atleta di U-19 y dama y cabayero di A-klas. Ta satisfecho cu e aña ‘ki a atrae varios atleta bou di 15 aña cu casi nunca ta participa den e tipo di campeonatonan aki.
Mayoria bes, segun Mena Curiel, ta e grandinan ta esnan cu ta participa. Sin duda e participacion di e atletanan hoben ta un progreso, tanto pa e campeonato mes, pero tambe pa e deporte en general. Volleybal mester inicia na un edad hoben. Por mira cu den Caribe mayoria ta cuminsa cu atleta mas grandi. Awo por mira cu na Aruba porfin a cuminsa na un edad mas hoben.
Volleybal ta un deporte cu tin mester di e parti tecnico, e parti tactico y mester siñ’e for di chikito, manera e expresion na Hulandes mes ta bisa “Jong geleerd is oud gedaan”, Curiel ta pensa cu esaki ta algo cardinal pa e deporte di volleybal.
Tocante Volleyball
William Morgan a inventa e deporte aki dia 9 di februari 1895. Na cuminsamento a yam’e “mintonette,” te ora cu un meneer di scol di Springfield College na Massachusetts a nota cu, mirando e wega, pa miho yam’e “volleyball.”
Ta considera Volleyball como un “team sport” den cual dos ekipo di seis hungado cada un ta separa pa un net. Cada team ta purba score punto door di logra cu e bala ta mishi cu suela na e otro banda di e net, claro bou di reglanan bon organisa. Desde aña 1964 e ta forma parti di e weganan olimpico internacional, cu e aña ey a tuma luga na Tokyo, na Japon. A introduci “Beach Volleyball” durante e weganan olimpico internacional di aña 1996 organisa na Atlanta, na Merca.
Ta estima cu mas di 6 miyon deportista ta practica Volleyball na Merca so, for di unda el a nace. Asina mes, e pais cu e cantidad record di medaya di oro pa Volleyball den weganan olimpico ta Rusia, mientras cu pa Beach Volleyball ta Merca y Brasil.
A funda Federation Internationale de Volleyball (FIVB) na april 1947, ora cu representantenan di no menos di 14 pais, cu tabata Belgica, Brasil, Czechoslovakia, Egypto, Francia, Hulanda, Hungaria, Italia, Polonia, Portugal, Romania, Uruguay, Merca y Yugoslavia a reuni na Paris. Nan sede principal ta na Suisa.
Apelacion
E presidente di Aruba Volleyball Association a haci un apelacion na e federacionnan encarga pa nan por organisa mas campeonato pa e deportistanan mas jong di 7, 8 y 9 aña, mirando cu esey ta e edad ideal pa cuminsa cu e deporte di volleyball.
Tremendo acogida
E campeonato mes a cuminsa pa 5:00 di atardi y pa alrededor di 10:00 pm tabata bezig cu e ultimo wega. Ademas di bon wega e campeonato a conta cu un publico hopi grandi di mayor y famia cu tabata presente pa mira nan yiu hunga. Por ultimo Mena Curiel a gradici henter e cuerpo di referee cu a traha incansablemente pa guia e weganan desde november. Tambe a graidici tur “scorer”, tur atleta y tur e coachnan cu a traha duro pa por yega final.
AVA ta satisfecho y a mira un desaroyo den e deporte. Tin cierto cos pa drecha pero e organisacion ta contento cu e weganan cu a tuma luga. E team cu a sali ganado tabata “You know” kende a resulta campeon di “A-klas”.
Resultado final
Dames U-15:
Volleyball Positivo -Campeon
Venum V.T – Sub Campeon
Heren U-15:
Volleyball Positivo – Campeon
La Fama Spartans – Sub Campeon
Dames U-19:
Volleyball Positivo – Campeon
Venum – Sub Campeon
Heren U-19:
La Fama Spartans – Campeon
Volleyball Positivo – Sub Campeon
Dames A Klasse:
You Know – Campeon
All Set – Sub Campeon
Heren A Klasse:
La Fama Spartans – Campeon
Volleyball Positivo – Sub Campeon
