Dios tene misericordia di nos, y bendiciona nos, y haci Su cara reesplandece riba nos, pa Bo caminda por ta conoci riba tera, Bo salbacion memey di tur nacion (Salmo 67:1-3).
Reconoce cu Señor, E ta Dios, E ta esun cu a traha nos y no ta nos a traha nos mes, nos ta Su pueblo, y e carnenan cu e ta pastoria. Drenta den su portanan cu gradicimento, y su plenchinan cu alabansa, dun’E gradicimento bendiciona Su nomber, pasobra Señor ta bon, Su misericordia ta pa semper, y su fieldad ta pa tur generacion (Salmo 100:3-5).
Nos tin cu balora locual cu nos tin pasobra ningun ladron no ta drenta un cas bashi, nos tin cu balora nos poblacion, famia, matrimonio, hubentud, y roga na Dios pa e cuida e pida baranca aki pasobra di berdad nos tur por mira con e enemigo ta cana rond manera leon cu ta gruña buscando ken e por devora.
No ta tempo pa haci wega pero ta tempo di guera den oracion pasobra e palabra di Dios ta bisa: Pasobra nos lucha no ta contra carni y sanger, sino contra gobernantenan, contra e podernan, contra e forsanan mundial di e scuridad aki, contra e forsanan spiritual di maldad den luganan celestial (Efesionan 6:12).
Pasobra e armanan cu nos ta bay cu ne, no ta carnal, ma poderoso den Dios,pa basha fortinan abao, y pa destrui e speculacionnan y tur arogancia, cu ta wordo lanta contra e conocemento di Dios, hibando den cautiverio tur pensamento, pa haci nan obedecido na Cristo, y nos ta castiga tur desobediencia, unabes cu boso obediencia ta completo (2 Corintionan 10:4-6).
Pa un hende por bringa maldad e mester separa su mes for di maldad, p’esey e palabra di Dios ta siña nos: Somete boso mes na Dios. Resisti diabel y e lo bay for di boso. Hala cerca Dios y E lo hala cerca boso. Limpia boso mannan, boso pecadornan, y purifica boso curason, boso di curason dobel (Santiago 4:7).
Bendiciona ta e nacion, cu su Dios ta Señor, y e pueblo cu El a scoge pa su propio herencia (Salmo 33:12).
No lubida locual ta para skirbi;
Husticia ta halsa un nacion, ma pica ta berguensa pa cualkier nacion (Proverbionan 14:34).
Ta momento di pone tur emocion un banda, y wak bon den e direccion cu nos hubentud ta bayendo, wak con e enemigo ta jaag tras di matrimonio y famia, cuanto division tin den pueblo, tene cuenta cu e peleanan riba caya, e inmoralidad cu tur caminda kier drenta cu su mal holo, ta suficiente motibo pa nos core yega na e trono di gracia di Dios, pa nos por haya pronto auxilio, y ayudo na tempo.
Ta ken ta mas grandi cu nos Dios, ta ken ta mas poderoso cu nos Dios, O Señor, tende, O Señor pordona, O Señor scucha y actua. Pa Bo mes causa, O mi Dios no tarda.
Laga e nomber di Dios sea bendiciona pa semper y semper, pasobra sabiduria y poder ta pertenece na dj’E. Y ta E ta esun cu ta cambia e tempo- y epocanan, E ta kita rey y pone reina. E ta duna sabiduria na sabionan y conocemento na e hombernan di comprondemento (Daniel 2:1-2).
Laga nos uni den oracion y stop di bringa contra nos mes, pasobra grandi ta Dios, ta solamente Dios merece tur honor y gloria, pasobra ta solamente Dios tin poder riba tur cos.
Pasobra mira scuridad, lo tapa tera, y scuridad profundo e pueblonan,ma Señor lo briya riba bo, y Su gloria lo aparece riba bo.
Sinceramente,
Pastoor Marcel Balootje.
